【SOHO】4招讓home office一樣有工作效率

辦公室生活枯燥乏味，愈嚟愈多人走去做freelance喺屋企接job，或者自己搞啲小生意。Small office 或者home office聽落好似好吸引，冇特定的工作時間，自由自在，自己係自己的老闆，做錯野唔怕會比人鬧，但好多人都會因為缺乏一個規律的工作時間表，導致工作效率嚴重下降！一日24小時都嘔唔到份野出嚟。想喺屋企做野都有幹勁、有精神，其實唔難！
1. 制定工作時間表
由細到大，老師同父母都會叫我地整一個time table跟住嚟做野，可見時間表對學業同工作都同樣重要！即使工作環境就係自己屋企，都要當係番工一樣，幾點起身、做野、休息同放工都要預先計劃好，可以有效率地完成工作之餘，又可以擁有屬於自己的私人時間，做自己鐘意做嘅野。而且每次搞掂曬to-do list嘅野，都會寧舍有滿足感架！

2. 注重衣著
大家番到屋企，應該都會即刻換番套舒服的睡衣休息，但在家工作的人，就千祈唔好早、午、晚都喺屋企着住套睡衣通屋走喇！咁樣只會令你產生慵懶的感覺，一個唔覺意就hea左一日，或者做做下野方便得制，就走左去訓覺。雖然話在home office做野都要注意穿著，但唔一定要打番條呔、着番對高踭鞋先叫得，換一套優閒服飾，好似你平時去街咁，舒服而整齊就可以，着得好睇又輕便，做野自然都上心啲啦！
3. 打理好辦公桌
相信好多人個書房都係亂七八糟，啲野周圍隨手亂扔，但既然要在屋企工作，就唔容許咁嘅情況出現！試諗下你坐office都唔會喺個亂葬崗裡面做野啦係咪？所以執乾淨一張企理、整齊的辦公桌比自己，唔好放咁多零食、公仔擺設或者明星海報在檯頭讓自己分心，做野效率自然高啲，又可以營造出辦公室專業的感覺！

4. 建立自己的工作圈子
在家工作的其中一個唔好處，就係難免會感到孤獨，做得差、做得好都係得自己一個人承受，食飯冇人同你吹手，又冇得去pantry講下是非，有時真係會幾dry幾悶，甚至終日只沉迷網上虛擬世界。所以，多啲去參加同業的聚餐活動、講座，認識下啲同行，間唔中一齊傾下計、交換下工作心得同進度，何嘗唔係一個擴闊視野、建立圈子的好機會？
坐office嘅總係會好羨慕可以喺屋企工作的人，但番home office又係咪真係咁梳乎呢 ？其實每份工作都有佢的苦與樂，最重要都係自己做得開心！