【打工仔健康】8招幫你祛除體內濕氣

打工仔星期一至五朝九晚七，日日都做到就嚟死咁制，啱啱番到公司就已經覺得攰到唔想做野，但你又有沒有想過，你總係覺得訓極都唔夠，並不是因為你唔夠訓，而是因為濕氣的緣故 ?
話咁快又三月，春天又嚟喇 ! 即係代表濕漉漉、又黐又立嘅天氣要登錄香港喇 ! 可能你會話，做左幾十年人過左咁多個春天，咩濕氣都冇有怕啦 ! 但每逢春夏季節，很多人生病都是跟濕氣重有關，連中醫都話都市人十個有九個都有濕邪潛伏，加上打工仔少運動，又鐘意食辣野、重味嘅野同甜野，攝取過多糖份、盬份和脂肪，只會影響人的脾胃功能。當脾胃沒法把食物轉化成營養時，殘餘的物質就是被中醫判斷為濕毒的症狀。濕氣留在體內，會導致人全身軟弱乏力、頭髮同臉都油立立，仲會出現痰多、口水分泌多、水腫、肥胖和免疫力下降等的問題 ! 嚴重可引致濕疹、雙腿浮腫、哮喘、高血壓、脂肪肝、心血管疾病和惡性腫瘤等 ! 而家問你知驚未 ? 點先會積聚濕氣在體內 ?
其實經常吹冷氣、飲凍飲、食生冷野、飲食不定食同熬夜等已經是最傷脾胃健康、最容易增加體內濕氣的行為 ! 呢啲會不會就是你平時的生活習慣呢 ? 想祛除體內濕氣、重拾健康的身體 ? 以下8個方法絕對幫到你 !

1. 注意開冷氣的溫度
每逢夏天相信好多人都係冇左冷氣唔得，甚至成晚開住個冷氣訓，其實吹住冷氣訓覺同冬天不蓋被睡覺是一樣，加上冷氣吹出嚟的風屬外寒，長時間吹冷風，血氣就會開始凝滯，亦對脾胃不利，形成濕氣問題。所以不少要長期坐office的打工仔，會容易出現肚痛、腹瀉和腰痛等症狀，其實都係同外寒侵襲脾胃有關。可以的話，最好都係開窗同開風扇比較好，或者將冷氣的溫度調較到比外面氣溫低兩至三度就OK架喇 ! 可以減少濕氣積聚的同時，仲環保啲添 !
2. 適量運動
雖然在呢啲又熱又濕的天氣下做運動是比較辛苦，但出汗是一個最直接和最有效祛濕氣的方法。每天堅持做適量的運動，不論是劇烈運動抑或是較溫和的運動，都能有助紓緩壓力、活化血氣循環、強化身體各器官的運作、加快水份的新陳代謝，促進濕氣排出體外。

3. 戒口
炸雞、啤酒、甜品同火鍋，係咪諗起都覺得好味呢 ? 但甜膩的食物、生冷野、凍飲、辣野、酒類飲品、鹹食，甚至食無定時，都是最傷脾胃的飲食習慣 ! 甜品容易造成內分泌失調，造成血氣不足、臉色差和肌肉乏力。而生冷野則會令腸胃消化的吸收功能停滯，都會傷害脾胃。至於大家都好鐘意嘅酸辣麵同麻辣火鍋等辣野，吃得太多則會刺激口腔、食道和胃部，容易引起胃火、生飛滋同口瘡。想下火的話，建議大家可以飲啲綠豆湯或者食啲西瓜等屬涼性的食物清一清火。酒類飲品亦會刺激胃部，增加肝臟的負擔，對脾胃是非常之唔好架 ! 食得健康，但食無定時、飽一餐餓一餐，一樣會令到脾胃變得虛弱，容易患上胃炎、胃潰瘍等疾病。一個有規律的生活，飲食清淡均衡、定時定量、細嚼慢嚥，就是保持脾胃健康和祛除體內濕氣的一大要訣。
4. 健康食療你要知
想祛除體內濕氣，唔一定要睇醫生同食咩藥嘅 ! 身邊就有好多天然又好味的食物可以有助祛除濕氣 ! 最廣為人知的就一定是煲綠豆赤小豆湯解暑祛濕。綠豆和赤小豆均有解毒、祛濕和改善皮膚濕疹的作用，落啲冰糖，仲可以當飲品咁飲 ! 濕疹問題如果較為嚴重，就可以試下用當歸和苦參丸以解熱毒。紅豆、紅米、薏米、蓮子、山藥和茯苓等都能有效祛濕、健脾胃肺、利尿和改善皮膚暗黃等問題。胃口唔好的話，可以食適量的泡菜開胃下或者煲啲養生粥食，例如綠豆薏米粥和紅薯燕麥粥等，都是不錯的選擇。相反，對於脾胃本身就屬虛寒的人來說，飲太多涼茶可能會弄巧成拙，所以涼茶都是不適宜長期或大量飲用。

5. 穴位袪濕
按摩承山穴，即小腿後面正中的位置，能有效祛除體內濕氣、振奮體內的陽氣和紓緩疲勞。而按摩極泉穴，即腋下頂端脈搏跳動的地方，可以去心臟的火毒。因為該穴位是心經脈的重要位置，應該經常按揉，最少一日兩次，可以有助疏通經絡、調理睡眠和改善心臟不舒服的問題，包括打工仔經常出現的心悸和心口鬱悶的狀況。
6. 避免長時間逗留在潮濕環境
春夏季多雨，這時候就要更加避免淋雨和涉水，唔好比水份和濕氣包裹住你的身體四周。另外，夏天熱辣辣時，不少人都會貪地板涼浸浸而訓地板，但因為空氣中的水份會下降，導致地板濕氣重，訓地板會容易造成四肢痠痛乏力。

7. 保持衣物乾爽
春夏季天氣潮濕，洗完衫都唔係咁易乾到，但千祈唔好將潮濕未乾的衫着上身，出汗或淋雨後更加要即刻換上乾爽的衣服，潮濕下雨天時最好減少外出，亦要注意水份的攝取量。

8. 留意身體警號
所謂要對症下藥，要祛除體內濕氣，就更加要知道自己身體究竟係邊度出左問題 ! 以下就有幾個小測試可以比大家留意下，睇下自己有冇濕氣重的問題，分別係睇感覺、睇舌苔和睇大便。睇感覺，就係每日起身的時候會唔會覺得特別攰、頭昏腦脹、訓極都唔夠、冇精神、周身唔舒服，仲懶得郁 ? 如果有齊曬咁多個徵狀，就可以肯定你體內有濕氣了。睇舌苔，健康的舌苔應該是薄薄一層白和濕度適中。如果舌苔又白又厚，仲好濕潤，則表示你體內有寒毒 ; 如果舌苔很厚或者粗糙乾涸，即係你體內有濕熱的症狀；如果舌頭深紅而冇苔，即表示你身體已經達到嚴重濕熱的程度 ! 睇大便，如果大便濕軟不成形，總是有排不清的感覺，就可以肯定你體內有濕毒了。另外，如果用成五、六張廁紙都擦不乾淨，也表示你體內有濕氣。如廁沖水後亦可以留意下有冇大便粘在馬桶上，若一箱水仲沖不乾淨，也代表體內有濕氣了。
打工仔食無定時，長時間坐office，欠缺運動，飲食習慣又唔健康，應該都離不開濕氣重的問題。其實只要盡量遠離潮濕的地方，保持空氣和環境乾爽清潔，濕氣重時按摩下穴位、食啲去濕的食品，培養運動和健康的飲食習慣，濕氣自然就冇頂企啦 !