【識少少扮代表】新人初嚟報到大忌

唔知係因為多左好多怪獸家長的緣故，定係受到社會風氣的影響，每逢公司請人，會遇到唔少古靈精怪嘅人嚟應徵，入到公司同啲同事一啲都夾唔到，甚至比人做唔到嘢嘅壞印象。其實作為一個新人或者初入行的職場新鮮人，有好多野需要由頭學起，一啲新仔大忌真係可免則免，否則你的職場生涯可能隨時玩完！
1. 咩都話唔識
雖然話你新入職唔係太熟悉公司的運作或者工作內容，但係公司請個人番嚟就係想多個人幫手，唔係要個人番嚟一碌木咁坐喺度咩都話唔識做！呢個時候最考一個人有冇求學精神，唔識做會唔會主動去問人，對方唔得閒教你都好，你會唔會去睇下人地點樣完成有關工作。好多野都係一次生兩次熟，唔識咪學到識囉！

2. 過份被動
雖然名義上你係一個新人，但人人同樣都有表達自己的權利。人地問你意見的時候，唔需要因為自己係一個新仔而推搪，好多人就係因為太被動、太謙虛而失去寶貴的機會！
3. 用新人的身份做藉口
新人唔係大曬！人地唔會因為你係一個新人而對你特別寬容、工作特別輕鬆！大家的工作能力都差唔多的時候，冇理由要人地咩都就曬你、仲要請埋你食lunch掛！

4. 到處擦鞋
人人都話識人好過識字，好多人一入到間新公司，就想周圍拉下關係、拜託對方多多關照你。人地同你先第一次見面，你就做到出曬面，係人都估到你有咩企圖啦！其實在公司人人都有自己嘅野要忙，邊度得閒抽時間睇住你呢個新丁呢！所以勸你都係慳番啲鞋油，做啲成績出嚟好過啦！何況友誼係要慢慢從信任和溝通建立出來，唔係利益就可以買得到架！

5. 肆意批評公司
眼見公司在營運上有不足的地方，都唔應該隨意向同事投訴，甚至拎以前做過的大集團同公司比較。你入得嚟新公司番工，就係公司的一份子，公司在運作上有需要改善的地方，可以留待觀察過後在開會時主動提出，而唔係好似講是非咁周圍同人宣洩你的不滿，咁樣只會令人覺得你更加乞人憎！
每間公司都有自己的工作文化，去到一個新的環境上班，好多野都需要時間去適應同觀察。所以話，工作經驗再豐富的人，番新工都係要以新人的身份從頭學起架！