【打工仔天堂】6個工作與生活平衡最好的國家

話就話朝九晚六，但差唔多個個打工仔都要OT，每星期做足50個鐘咁制！工時長到堪稱世界第一！我地做得咁辛苦，日日瞓得嗰5、6個鐘，有啲國家嘅工時制度就可以比國民剩係番5、6個鐘！點解可以咁唔公平？究竟係邊啲國家咁有人性？我都要儲錢移民過去先得！
1. 丹麥
丹麥國民擁有全世界最短的工作周，每周只工作37至39小時，同香港打工仔真係天壤之別！可能你會問，所謂多勞多得，做咁少咪賺少啲、養唔到家囉？呢層你就完全唔洗同佢擔心，事關丹麥政府會投放大量資源喺家庭福利上，等員工可以無後顧之憂咁享受工作和生活，每年仲可以有5至6個星期嘅有薪假期放大假、休息歎世界、陪屋企人周遊列國，唔怪得丹麥咁多年都係「全球最幸福國家」嘅10強之一啦！

2. 挪威
挪威風景好、教育好、社會好，人人有工開，每周仲只需工作約40小時，國民可以有大把私人時間做自己野、陪屋企人。因此，挪威於今年取替左丹麥，成為「最球最快樂國家」的第一名，都唔係冇道理啊！
3. 荷蘭
荷蘭人平均每星期工作31小時，女性每周更只有約26小時的工作時數，難怪荷蘭會成為平均工時最短的國家！工時短係咪就代表荷蘭人唔鐘意工作或者懶惰呢？咁就唔係啵！只係比起工作同賺錢，荷蘭人更熱愛陪屋企人、外出活動同做義工。佢地平均每日同家人共處嘅時間可長達15小時！反觀喺香港，想番屋企飲碗湯都難！莫講話相處。

4. 德國
德國人平均每星期工作35個鐘，享有每年24日的有薪假期，認真識歎！不過，工時短嘅國家都可以成為歐洲工業大國？唔係啊嘛？你冇睇錯，德國真係咁勁。事關德國人工作好講效率，佢地做野特別專注同勤力，唔會覆whatsapp、吹水或者上網搞到自己分心。咁睇落係咪好似工作狂咁款呢？咁你就錯喇！德國人一收工就同工作再冇關係，連email都唔睇，真正將工作和生活分隔開、平衡兩者。
5. 瑞典
瑞典在幾年前開始試行6小時工作制，反應唔錯，員工做野更上心、更有活力，4、5點放工都仲可以好有精神咁去上堂、做運動、陪家人，享受屬於自己嘅私人時間。員工因為工時縮減而開心左，做野有動力左，更enjoy工作，同事之間的合作就更加暢順，冇咁多爭執同磨擦。既然6小時工作制可以令到老闆同員工都得益，咁香港都可以試下喎！

6. 法國
法國政府已立法，打工仔每周的標準工時為35小時，每日做8至9粒鐘，你想做超過10個鐘頭都唔得 (自願OT除外)。員工每星期只需番4日半工，lunch hour又長過人，每年更可享有27日的有薪假期，真係諗下都覺得歎！另外，老闆為左確保員工的休息時間，仲會簽署協同允許員工下班後唔接工作電話、唔覆工作email，名副其實嘅work-life balance！
睇完大家係咪覺得自己正身處地獄呢？不過點講香港同以上呢啲國家都係冇得比︰香港地方細、人口多、競爭大，人人都趕住開飯糊口，邊有得諗咩歎世界、6小時工作制？但係計我話，幾辛苦都要留番啲時間比自己、比屋企人，工作同生活點都要平衡下嘅。雖然唔平衡得幾多，但係大家都要撐住啊！