偽影評 - 《29+1》

偽品味 真鳩噏 於 31/05/2017 發表 收藏文章
Photo source: imdb.com

我知道,依篇嘢係出得比較遲。筆者都睇咗套戲好一段時間,依家先有時間好好咁寫下睇後感。

改編自舞台劇,主角林若君踏入30歲關口,工作繁忙但順利升職做女強人,但另一邊廂同男友感情表面靜如水,實情已經危在旦夕。
因緣際會下去咗一個同自己同年同月同日生嘅女仔黃天樂嘅屋企暫住一個月,仲發現對方嘅一本自傳式日記,林若君開始了解一個同自己截然不同嘅人生...

筆者係個90後,當年《29+1》舞台劇上時,自恃年青兼無乜品味可言嘅我,當然就完全唔知有上。
所以我係以一個完全無睇過個故事、fresh eye fresh heart咁走入戲院睇依套改編作品。
整套戲節奏明快,表現方式同一般港產片/電影都有啲唔同。
有時飾演主角林若君嘅周秀娜會跳出框框同鏡頭講吓內心心聲,唔知點解令我諗起The Wolf of Wall Street(雖則題材完全唔一樣)。
筆者幾鐘意依個方式,觀眾明白更多主角嘅諗法,自然就更加投入。
套戲另一種唔同就係劇本仍然有好重嘅舞台劇影子,最後結局睇到周秀娜行咗去Paris真係...不過依個只係一種表達方式,故事仍然係非常貼地。
導演彭秀慧舞台劇出名就係人都知,係首次執導電影,但係筆者完全唔覺得電影係新手上陣,處理得非常成熟,正!

套戲嘅一大亮點,係周秀娜。無錯,周秀娜好正,好正,好正(非常重要所以要講三次)。
筆者本身對周秀娜近乎零好感,對佢最深嘅印象仍然係人型攬枕,仲有一堆爛片(大家有興趣可上WIKI睇睇,掃一掃啲片名就知)。
對上一套睇娜姐嘅電影係小男人3,其實佢都做得唔差,但係因為角色都係嗰D性感秘書,無乜特別...
但係响《29+1》完全同性感零關係,大家聚焦响佢演技上面,娜姐作為演員終於有發光芒嘅一刻。
特別佢有好幾場喊戲,睇到我心都那住那住,直情有脫胎換骨嘅感覺,亦係令大家咁入戲嘅其中一個主因。

但係正如某啲評論所講,當娜姐帶大家入戲之時,欣宜就帶大家出返戲...
選角完全無問題,問題出响欣宜演戲時實在太用力,太over,搞到離晒地。
我完全明白黃天樂係天真嬌,但係唔係弱智,賣弄樂天得太誇張搞到有啲假。

可惜娜姐未憑依套戲拎到啲咩女主角提名。希望之後會有!

Overall speaking依套戲非常好睇,係近年其中一套我好鐘意嘅港產片! 特別係女仔去睇就最啱嘞真係中晒你心中所想!

P.S. 另外一提做娜姐姊妹嘅賴慰玲,戲份唔多但係都幾出! 果然係好戲之人。
標籤: 29+1  彭秀慧  周秀娜  鄭欣宜  電影  movie  

留言


請按此登錄後留言。未成為會員? 立即註冊
    快捷鍵:←
    快捷鍵:→