偽影評－Perfect Strangers 《完美謊情》

Photo source: imdb.com

有啲人好抗拒睇外語片，因為追字幕會追得好辛苦。而我心入面總會暗暗咁諗：難道依家香港啲人個個英文都咁好，睇荷里活啲戲會完全只聽唔睇字幕？
不過我自己其實係連睇港產片都係會睇字幕…（唔係唔識聽，只係習慣咗）

而我經常覺得响得香港上外語片都係有返咁上下質素。
之前令我最impressed嘅有兩套，一係《Hea爆扮公室》，講啲以色列女兵响軍營如何hea住過日晨；
另一係《無定向喪心病狂》，幾個短故事，癲到爆，睇得好過癮。
兩套講嘅文你一隻字都唔會聽得明，但係你都可以襯機欣賞吓香港配嘅字幕，其實真係配得好抵死，非常貼地。
依套亦係外語片，意大利文。
故事好簡單，就係一班frd聚餐，有人提議玩個遊戲︰食飯期間，電話來電、message，全部公開。
大家都想像到，遊戲一開首當然係好有趣。玩玩下，就玩出禍。

套戲場景唔多﹐主要都係靠啲演員對話、表情、動作等等將情節推進。
我非常欣賞依類電影，有時唔係下下要搞到好盛大，特技幾好幾多，擺咗幾多錢落去做後製。
單單睇幾個演員响度你來我往，絕對無悶場。
當然，有啲位係expected。但係，又有啲位幾unexpected。
最後嘅結尾亦令人有舒半口氣嘅感覺（真係得半口，仲stuck响之前嘅tense氣氛入面）。
雖然依個禮拜真係超多戲睇，依套戲亦無啲咩金球／奧斯卡提名，而且都上咗一陣嘞。
不過我覺得幾精彩，都推一推俾大家睇。