[#ff教室你問我答] 上個星期應承左大家會每5條問題開一個DSE你問我答，雖然遲左少少，但唔會消失！之後會陸續有更新，stay tuned!
睇睇有冇一啲你好有共鳴嘅問題！
Q1: F6依家溫書都係一頭霧水，好多嘢都未背，作文又唔好，好驚唔知點算⋯
首先你唔好慌張，俾個目標自己，知道自己有邊兩、三科係最有機會可以係呢段時間升到grade。你要知道冇可能將所有你有嘅之前都讀得晒，所以你淨係需要讀最有用嘅資源，最好拎啲時間用嚟重搵自己已經有印象嘅技巧或者知識，會好過睇新嘅筆記去學一啲未用過嘅技巧。用張紙寫寫低自己每一課究竟有啲咩可以溫，然後畫一個時間表，每一日將你只上面寫過嘅內容填番落去你哋一個月嘅時間表。入邊要有溫習、操卷、重溫，當你有一個時間表之後你就會知道每一日做啲咩先可以清晒你所有需要溫習嘅資料。
Q2: 如果依家F3要做啲咩，打好個基礎？
學業當然重要，但係如果你仲係中三嘅話，我建議你玩多啲學校入邊嘅活動，例如club/society/sports team，又或者係joint school，見識多啲唔同嘅人，同埋試吓搞活動或者係了解領導一班人需要咩嘅經驗。
如果係話同DSE有關，我覺得你最好可以養成一個習慣，就係每日返屋企係完成即日嘅功課，同埋會抽1小時溫習當日教過嘅內容，唔好淨係到考試之前先開始溫習。
另外，中英文呢兩科係需要特別多嘅時間去訓練。你可以試吓開始睇一啲英文嘅YouTube片，又或者係外國劇集等等。又開中文字幕，去到開英文字幕，去到最後可以熄字幕都睇得明。
Q3: 拍中文DSE片?
我拍過一條講閱讀同埋一條講說話，其實都係講返一啲我以前補習嘅時候學過嘅技巧。而我中文唔係特別好，所以應該唔會有好多講中文嘅片
Q4: 幾點到考場最好？
如果你有睇過我之前checklist嗰個post，你應該會知道踩線之後要記錄返你由屋企去到考場需要嘅時間。我會建議你預7:30去到考場，防止有任何交通意外而且俾多少少時間喺考場出邊同埋考場休息同溫習。
Q5:中文Q1可以點樣剪裁一個百搭題材？我中文唔係特別好，我所以我參考左一個朋友嘅睇法，其實用百搭題材嘅時候好容易離題，因為你諗嘅只係點樣將條題目塞落一個本身唔關事嘅故事。試吓喺作記敘文嘅時候先諗一個你想表達嘅意思或者昇華，而呢個嘅意義係同你嘅題目有關係嘅。然後諗一諗你以前參加過嘅一啲活動，例如合唱團、學界、搞活動、比賽等等。用一啲真實嘅經驗去填補題目去到你想表達意義中間嘅空位，整篇文章會更加容易扣到題同埋唔會有邏輯謬誤。
下集會繼續回答大家之前嘅問題，如果你哋有更加多嘅問題，歡迎DM我！我會盡快開post解答你嘅問題!
Flowsophic 有各種大師級學習資源 (齊全Past Paper、筆記範本、IES等等)，等你容易啲搵到晒唔使煩！我哋都會upload好多DSE技巧、大學生活、科目分享等，記得bookmark我哋網站定期check吓有咩更新！
請按此登錄後留言。未成為會員? 立即註冊