回到還在Openrice打滾的年代，膽粗粗學人搞飯局，召集各方為食之仕，三九唔識七，一起開飯。
由圍內朋友們的飯局，到後來，演變成為Facebook的公開群組，窮鬼飯局。
顧名思義，窮鬼不會吃貴東西，只是吃平民美食，價格每人＄100左右，最初還算搞得有聲有色，曾經試過在牛頭角下邨，連開五圍！
後來，因私務繁忙，窮鬼飯局無聲息地告別，加上近年的博客生涯原是忙，連重組的念頭也擱置。。
好了，言歸正傳，今年與家人做冬，不上酒店中菜廳，而是來到當年窮鬼飯局，其中一個飯局地點，石硤尾街的天祥飯店！
家母：（好多人做冬，大牌檔記得訂位！）
我：（你同我定啦。）
沒有訂位的晚上，直行直入，對面的愛文生，似乎人氣比較高一點。
我：（去乜鬼酒家酒店吖，實多人，價錢又貴，不如去大牌檔？話時話，我哋有無試過一家人，一齊踎大牌檔？）
三十多年以來，好像未試過，與家母在大牌檔晚飯。
家弟說：（好耐無去大牌檔，記得等陣叫個炒麵！）
我也很久沒來，上次到天祥，就是六年前，窮鬼飯局的一役，吃過美味的羊腩煲，最後埋單計數，每人的消費，卻略略超過每人＄100之數。
作為搞手的我，事後一樣比人X，窮鬼嘛，一個幾毫也大過天的。
我：（以前就話有啲勢利眼，看唔起啲人踎大牌檔，我就話，你都唔識嘢，在大牌檔與朋友們飯局，一邊飲啤酒，一邊吃地道小炒，才是至高無上的享受！）
首先上桌的，是我喜愛的蒜茸炒豆苗，老侍應禮貌周周，不斷多謝前多謝後，少卻大牌檔應有的粗聲粗氣，我反而覺得受寵若驚。
我：（以前覺得豆苗好貴，我哋點會食得起？出咗嚟做嘢，每逢冬天到中菜館，十次有八次，都會叫碟豆苗食下！）
豉油皇炒麵鑊氣夠，但不夠乾身，而且辣醬不是余均益。。。恕我奄尖了。
家常菜的代表，土魷蒸肉餅，做得夠紮實，土魷的味道突出，肉餅的質感偏向爽口，而不失鬆軟，吸收了土魷的鹹香，當然好吃。
我：（蒸肉餅呢家嘢，當然係老母你做得最好啦！唔使多講！）
原來，我沒吃家母弄的蒸肉餅，起碼超過二十年！
人在大牌檔，椒鹽菜式的曝光率長期高企，不可或缺，否則，怎對得起桌上的冰凍青島啤？
薄薄的黃金外層，包著的是鮮甜，彈牙，高水準的椒鹽鮮魷！
家母：（倒啲啤酒過嚟啦！）
家母又問：（上次我在俄羅斯買比你果支伏特加，開咗未？）我當然說未啦，給她知道我飲烈酒，仲得了？
說起上來，我阿公，舅父是酒鬼，她當然不想我步他的父親，表兄後塵。
我：（哈哈，未開呀。。。）轉話題。
不如叫多碟豉椒炒蜆？
單憑肉眼所見，蜆肉非常飽滿，惹味，辣度頗強的豉椒汁，把鮮甜的蜆肉完全征服，一隻駁一隻，轉眼間，桌上只剩下蜆殼。
大牌檔的本質，不論是數年前的經濟不景氣，到今天的所謂經濟好的幻像，仍然稱得上平，靚，正！
我：（以前的天祥，仲多古靈精怪嘢，不過數年前轉咗手，無晒果啲特別嘢。）
不過，餐牌上的選擇，依然引人入勝，想起，已荒廢的窮鬼飯局，是時候重新出發？
等我得閒先啦。
天祥飯店：深水埗石硤尾街醫局街98號利德昌大廈側
請不忘讚好我的專頁：https://www.facebook.com/foodiesmashingpumpkins
請按此登錄後留言。未成為會員? 立即註冊