糖醋排骨

見大家都對我呢個糖醋排骨有興趣，咁我就post個食譜出來吧！
我呢個曾經被叫做「地獄廚神」嘅主婦，自從三年前跟咗瘦身教主唐安麒個宇宙飲食，知道飲食健康是幾咁重要，就開始努力學自煮，家陣雖然未變身做美味廚神，但都煮到兩味餵飽屋企三位成日扮食神嘅老細。

好喇！要煮好餸，買對材料好重要。


呢味糖醋骨要揀短身有少少肥嘅一字骨，炆完出嚟先又冧又滑。有少少肥唔使怕，炆完之後乜油都出晒嚟。減肥唔係要完全戒油，脂肪係人體必需的，不可缺少，完全戒油會好易出皺紋架！

材料：一字排骨十四條，羗兩片

調味料：一湯匙紹興廚酒、兩湯匙米醋、三湯匙白糖、四湯匙醬油（包括兩湯匙生抽和兩湯匙老抽）和五湯匙水

見到個配方未？一二三四五，所以呢個排骨又叫數字排骨。

還有是白糖可用brown sugar代替，比吃白糖這些精制糖有益。

做法：首先洗乾淨排骨，鍋內加入以上調味料和兩片薑，開大火便放下排骨。
如圖：


汁料一滾便要轉中小火繼續炆40-45分鐘，其間要翻一下排骨，上色會靚d。最緊要睇火，因為每個人屋企個爐火力大小不一樣，煮多幾次就知時間。


我呢d廚藝有限公司都煮得似模似樣，所以絕對唔難，小朋友仲好鍾意食添！