360相機最佳腳架?JOBY TelePod 325腳架實測【Toy Story】

大男孩生活館 於 18/11/2019 發表 收藏文章

大男孩現在最常用的相機就是Insta360 ONE X,360相機係唔可以用手揸住嚟影嘅,因為會將手指影晒入鏡,一定要用自拍棍或者三腳架,先會影得好影得靚。

除咗手持影相之外,將相機放低嚟影都好常用,所以一支多功能嘅自拍棍就最適合不過,今次就會測試呢一支JOBY嘅TelePod 325,貪佢又係自拍棍,又係三腳架。

事不宜遲,睇段片先:

睇完段片,唔知大家覺得呢支自拍棍點樣呢?不如響下邊留低你個comment。

JOBY TelePod 325俾我嘅第一個感覺係好細支,收起來比起Insta360 ONE X長少少,可以連相機成支放落背囊或者袋。當佢做手柄用手揸住時係咁嘅樣嘅:

當然叫得自拍棍,佢可以伸長,總共有四節,伸到最長56cm,收埋20cm。老實講唔算好長,但用360相機其實都唔使咁長,因為相機鏡頭已經好廣角,反而收埋細細支方便攜帶最緊要。

用TelePod影既Tiny Planet

唔伸長,當佢一支桌面三腳架都得,官方話承重325g,就咁用唔伸長嘅話放部重少少嘅相機上去都應該冇問題。

拉高佢當三腳架用,亦都係大男孩最常用嘅模式,好啱用嚟影Time lapse。你放落地下會覺得好矮,但360相機乜都影晒,唔需要較角度,但大男孩經常將佢放喺枱面,石躉上面用。

最後攝影手柄模式,用嚟自拍隻手就會太近鏡頭,會影晒入鏡,用嚟影其他人或者景就冇問題。

雲台頂有狗牙位,鍊住佢擰相機會擰得實一點。

個底座就咁大,係會影到入鏡,係所有360相機腳架嘅通病,如果影相嘅話可以簡單後期抹左佢,影片嘅話就要自己盡量避咗佢。

手柄位有橡膠,揸住嗰時幾舒服,亦起到防滑作用,冇咁易甩手。

球型雲台可以自由調校角度,方便用普通相機或運動相機,用360相機只需要打直就得。呢個旋鈕要盡量藏在相機底部,鬆開側邊的六角螺絲,可以重新設定旋鈕鎖緊後的角度。

打開後實際長度係咁樣嘅。

呢支就係大男孩最鍾意用嘅Insta360 One X自拍棍,夠細支方便攜帶,揸上手又得,放低影亦可以,如果雲台可以拆除就仲好。

你又鍾意用邊一支自拍棍呢,不妨同大男孩分享一下。

大男孩Facebook
http://www.facebook.com/hkbigboy
大男孩Youtube
http://www.youtube.com/hkbigboy
大男孩Instagram
http://www.instagram.com/hk_bigboy

如果喜歡我們的文章,請即分享到︰

留言

會員
我要評論
請按此登錄後留言。未成為會員? 立即註冊
快捷鍵:←
快捷鍵:→