【 裝修仝人誌.Viann篇 】打破固有觀念 權衡文化與規則

裝修佬話你知 於 30/07/2020 發表 收藏文章

一間公司營運離不開老闆施政給予方向,由管理層安排,下層實行。而管理層是老闆與下屬之間的橋粱,一層層的關係中,管理層難免會在協調兩方時面對困難。今天由DECO-TV部門的主管Viann分享她與裝修佬的故事。

公司進步需權衡文化與規則
Viann是最後一批在co-working space留下足跡的員工,隨裝修佬走進5000呎辦公室。她發現裝修佬作為初創公司迅速走上軌道後,管理模式亦同樣有著改變。

「以前喺co-working space,大家都好主動,因為大家都有同一個目標,就係想呢間公司變得好。嗰時大家會喺枱前大叫『拍呢條片好唔好?』,『好啊!聽日幾點去拍!』就會行動。」

「但公司擴展咗之後,工作量增加一定要面對一個問題,就係要更謹慎去安排工作先後次序。要實踐公司文化同時,規矩同樣變得重要。當你想提議去做一樣嘢,例如拍一條片,需要花好多心思去prove個value喺邊度,點解重要過你手頭上嘅工作。」

「雖然咁有時會令同事提議失敗,係可惜嘅。不過花咗更多時間去prove佢值得嘅事務,多數質量都係高嘅,係真正值得做嘅嘢。公司講求效益嘛!」

震撼教育之上是破斧尋舟
當每樣項目都要求高效率效益,對員工的要求自然高,公司就承擔著讓員工們能力提升的責任,裝修佬會用一種截然不同的方法培訓各個員工,包括Viann。

「老細好鍾意震撼教育,先衝擊你固有認知,重新再建立新角度,俾啲新視野你。個過程確實係好難捱。」

Viann回想起她也曾經歷過這種震撼教育。「當初開始做DECO-TV阿Head,好多相關嘅知識都唔夠,好多唔擅長嘅嘢。老細覺得我可以,佢就會逼我去做,要我脫離Comfort Zone。有試過同下屬鬧交、花好多時間去學製作嘅嘢等等,過程好辛苦。」

成長必需陣痛,必需面對失敗。「被不斷地挑戰底線,都有唔少次失敗,佢再安排其他試練,直到搵到方法為止。我到最後都係捱過咗,先諗返起以前覺得自己咁後生就打一份可以好好掌控嘅工,覺得冇成就,先選擇入嚟呢度,想脫離原先工作嘅安舒區。」

「所以唔好當入嚟裝修佬係收錢做嘢,覺得可以舒舒服服,咁你唔好入嚟裝修佬。因為喺呢度會不斷被挑戰,衝破得到個成長係你難以想像,唔得就會byebye。」 Viann如是說。

震撼教育之下是體貼入微
現今Viann已是管理層之一,深明裝修佬震撼教育過程的艱難,她反而想以一個貼心體面的管理層形象去讓員工進步,不希望自己的下屬產生太多負面情緒。

「在我而言,下屬係我嘅BB。當然係要chur佢完成晒所有工作,但我想佢有一個開心嘅工作環境,係盡量令佢明白呢個係佢duty,唔係強行同佢講呢個你一定要做。我會用一啲 soft 啲嘅說話。」

「好似係近期公司為培訓員工安排狼人殺活動咁,員工可能會覺得工作量大點解仲要抽時間去玩?如果同下屬講『嗰日一定要留係度玩!』,咁嘅話同事們一定會抗拒。就好似老細口頭蟬一樣『你get唔get到?』,佢好想人知狼人殺其實係個長遠計劃,想用遊戲去提升同事能力姐。」

「如果佢企咗喺一個強硬嘅位置,我咪企喺相對柔和嘅位置囉。我想喺下屬心目中係個完美嘅上司,體貼同傾到偈嘅,會企喺佢嘅感受諗,令佢有啲咩困難都可以直接同我講,咁先易於解釋公司嘅政策其實係對同事好㗎嘛!」

社會實驗讓管理層走上前線
裝修佬在不久將來擴展到海外,除了震撼教育,Viann正面對老闆為管理層準備的另一個挑戰。

「依家開會佢會刻意走後一步,等我哋自己傾,就算有幾多爭執。」

「我覺得佢對我哋做緊好多社會實驗,依家正係預演將來佢唔喺香港公司我哋呢班management group點去做管理。如果員工間發生爭執要點做,令到我哋明白我哋各自有咩可以做,應該點做,就算間公司冇左佢我哋可以點去傾呢樣嘢。」

「一般初創公司大會都係又老細主持大局,依家由我哋嚟處理返員工之間嘅拉扯。坦白講,有種走返去前線嘅感覺。就算幾唔想面對,都要捱過陣痛期嘛!」

初創公司發展迅速,當走上軌道後,管理模式有所改變,所生的壓力必然較之前大。公司催促員工價值提升同時,管理層需多花心思思考如何化解員工的情緒,從中建立良好且互助的關係,藉此提升雙方的自我價值,才能把公司帶得更遠。

原文連結

如果喜歡我們的文章,請即分享到︰

留言

會員
我要評論
請按此登錄後留言。未成為會員? 立即註冊
    快捷鍵:←
    快捷鍵:→