裝修名人堂 潘師傅 Wallace 熱誠歷練合一 工程系統化 給予清晰裝修面貌

裝修佬話你知 於 22/07/2020 發表 收藏文章

熱誠與歷練,Wallace與潘師傅相知相惜,成了今天的兄弟班。「呢行好得意,可以叫做兄弟班。點解我當年入行,就係因為我老豆,呢一行唔係話想做就做,最好有熟識嘅人帶你入去,係相識,係傳承嚟。」

潘師傅自小被父親帶入裝修行業,一做便是二十多年。「老實講我做咗咁多年熱情都減退咗,但Wallace對呢一行嘅熱誠燒埋嚟,真係直情熱到出晒汗哈哈!」而Wallace從裝修配對平台開始接觸裝修界,慢慢發現自己對裝修行業有著極大的興趣,潘師傅被Wallace的熱誠所感染。

技術與溝通 相輔相承
Wallace同樣,對潘師傅有莫大的信任。「我哋拉得埋,因為潘師傅有現場施工經驗,佢手工好,我對佢百分之百信任,唔會出事,唔會延期,唔會爛尾先同佢合作。」

「裝修呢個行業係好講人同人嘅溝通嘅工業。溝通好重要,我做開sales,溝通能力會強啲,加上裝修平台經驗,第一時間會get到佢想要乜。」

溫文的Wallace認為兩人可以一拍即合,在裝修行業中相輔相承。「其實係互補不足,我想係呢行發展,但我需要一啲技術層面嘅幫手,然潘師傅又想搵個啱嘅partner,令佢同啲客溝通會順暢啲,打好關係。例如有時師傅忙起上嚟,覆唔到客,嗰啲嘢就交左俾我處理。」

專業形象 貼心建議
公司開業不久,背後雖有豐厚施工經驗及溝通技巧,仍面對如何招得客人信任的挑戰,但潘師傅和Wallace都有各自的方法,做實事同時提升公司的形象。

潘師傅觀察到客人對裝修界的不信任來自欠缺溝通和固有印象。「個客要裝修通常會對行業師傅好多疑問,『你會唔會偷工減料』,『會唔會你包嘅又話要我俾錢』,『收左訂會唔會遲開工』等等。」

「所以要溝通,要show一啲較為專業嘅形象同行為俾客人睇到。喺簽約前傾好,個客覺得我哋專業,咁先落實簽單。過程都要不斷同客溝通,個客就會覺得,『你真係著緊我個單位㗎喎』。」

「公司有6-7個人,都有自己團隊,去跟進每一個項目,各安其份,啲客有信心,呢間公司真係唔係one man band。我哋會分返科,泥水有泥水科,油漆有油漆科等等,分門別類。好清晰咁同客講每一項目每一個錢包乜嘢,物料邊個供應。我哋都會同啲客出去揀料俾意見,甚至比較埋價錢,令客覺得貼心。」

工程系統化 給予客人清晰裝修面貌
Wallace視之為工程系統化,讓對裝修陌生的客人也能有概念。「我哋都做咗好多嘢企係客人角度諗。我哋將工程流程系統化。做到每個步驟都有圖,施工圖水電圖等等,去同啲客去確認。客人就算唔係做我哋呢行,都可以picture事件點發生,我哋好著重呢樣嘢。」

「每個客人都會有一套呢啲嘢,佢將來用又好,而家自己諗又好,係圖上面加加減減。圖、相,拍片,令工程透明度提高。另外,客人都可以隨時上嚟。我哋亦會主動話返比客聽個工程行到邊度,令客唔需要擔心,知道個場發生咩事。」

獨具慧眼 知人善任
除了對客以外,對內亦由潘師傅配合。他負責看管整體工程運作,調配合適人選。「一個好嘅師傅係要睇臨場經驗。我哋呢一行冇話有一個好正確嘅文憑認證,有牌都只係代表佢係有認知,但都要睇返師傅嘅手工。而證明佢嘅能力都係靠口耳相傳,只可以話乜乜經驗強大。」

「而客人唔會係施工前就知道師傅嘅技藝,我就要好好把關,就我對師傅嘅了解去配對,判斷返呢個手工呢個價錢合唔合理,邊個師傅手工配合到呢位客人嘅需要,其實好似捉棋咁。」

新舊合一 繼往開來
新舊合一從來不易,師傅們總有自己的傲氣。「師傅有時唔太聽人講嘢,因為對自己嘅技術喺呢個市場上好有信心,鍾意做自己嗰套。」

經過與年輕人的合作,潘師傅笑言「所以我而家都會聽佢哋講,喺佢地身上學識咗溝通,互補不足。唔會話我做大嘅就大晒,我有時做錯咗都會同佢哋認錯。件事完咗,大家做得好或者唔好,我哋都會拎返出嚟講,會一齊賽後檢討。」

熱誠與歷練的結合,Wallace與潘師傅善用及學習雙方的優點,為了把最完善的家給予客人。

如果想知道自己適合的設計風格?歡迎到裝修學院做個裝修設計心理測驗
想裝修屋企/維修家居?登記「裝修佬」免費裝修報價,24小時內專人回覆,為你推介最適合你的裝修公司。

原文連結

如果喜歡我們的文章,請即分享到︰

留言

會員
我要評論
請按此登錄後留言。未成為會員? 立即註冊
快捷鍵:←
快捷鍵:→