裝修名人堂:Rocky 追上潮流 加強透明度 提升業界形象的使命感

裝修佬話你知 於 27/02/2020 發表 收藏文章

Rocky回想起在裝修工程公司做sales的接單生活。當年大學畢業人工九千,每天由九點做到十二點,三年間他從公司裡學會了室內設計,從工地裡學會了如何管理Project。當他想試新事物時,卻因為自己是打工仔身份而被公司「綁手綁腳」。

「會唔會有方法可以真正自己去掌控一單Case?」的想法在Rocky腦海裡萌生,因此Rocky離開了公司,重新修讀室內設計,開設自己的公司。自己做裝修,跟做打工仔時同樣花時間,但他認為一個個工程的完成,是一件件作品的誕生,心景不同,成功感讓他非常滿足。

管理在於設身處地 一眼關七
豐富管理工程經驗的Rocky笑言:「管理是三煞位,受客人、公司、師傅氣」。那他是如何處理管理人員的難處?同理心,代入角色,顧及所有持份者。「有時師傅要氹,你就要諗點解師傅唔肯做?原來佢工具唔夠,係因為公司提供資源唔夠,我就幫佢爭取。客,其實都係想你管理得妥當,咁咪定期匯報資訊,影相拍片,話俾佢聽所有嘢on time。公司,唔好令公司虧損,要做嘅嘢就係幫公司宣傳,做好個形象,例如細心check工地要保護嘅地方。」

「做得耐,而家一入工地就知咩地方出問題。邊度未鋪好保護,邊度容易整花,邊度危險。主動去留意有咩唔啱,然後立刻解決,同埋提返班夥記。」

不故步自封 成功失敗都是經驗
講到公司的優勢時,Rocky自豪地說他喜歡挑戰一些自己未做過的事。「我一路同我啲夥記講要keep住做一啲我地未試過嘅嘢,你唔好怕蝕錢,唔好怕果樣嘢難做。只要你未做過,果樣嘢又係合理價錢範圍內就去試,我會俾空間你試,因為我哋唔可以一成不變。」

一成不變,Rocky說很多裝修公司都會重覆做一樣格式的工程,來來去去同一種風格。但他們不同,市場上有新建材、新做法,甚至新的合作伙伴,他們都會去試。嘗試的過程其實非常辛苦,經常碰壁,但Rocky明白裝修界不能像零售一樣,「重複賣黎賣去嗰幾樣嘢,你一定會被淘汰。因為基本嘢好叻嘅師傅好多,所以我哋就要試要新,破解佢。」
很多客人會覺得老師傅一定比年輕人公司好,Rocky並不認同。「我哋成功同失敗嘅經驗多過其他老師傅,而且肯試新嘢,新建材做法嘅經驗一定比老師傅多。」那他是如何說服客人去試新的建材?Rocky認為每次想客人試新建材時,最重要的是透明度。必須解釋得清清楚楚,講明優缺點、施工方法、建材成本。「我哋會同佢講收平啲,只係收返合理利潤。」成功所得的經驗,遠比金錢來得有價值。

使命感:改善業界 加強透明度
「我呢十年裡面,裝修嘅世界已經好唔同。以前客人只係睇價錢同成果,而家啲客人要流程,會問得好細,你點做,有咩證明你做過。」Rocky在裝修界打滾十年,心裡有個使命,他希望令業界的透明度增加。Rocky聽過無數無良工程個案,早三四年多數也是收錢後「走佬」。近期則多師傅「死拖爛拖」,但成品參差不齊。

「我唔想裝修界多一單爛尾,除咗自己公司要做好佢,都想幫業界做啲事,我想業界嘅形象正面啲。」,「有啲人一世只裝修一次,我唔想你後悔,你唔搵我唔緊要,我都想你好,所以我都幫人睇下份報價單,話俾佢聽有咩位要留意同小心。」

裝修佬教你裝修
想裝修的人有甚麼要注意?Rocky答:「要睇公司背景」。「初創公司冇support可能有少少風險。佢地鋪頭可能係借人場地、工廈,甚至商業地址登記係佢嘅屋企,有事要追討好難。如果有啲規模嘅公司,差極有個譜,告都有得告。所以要了解公司嘅背景歷史,點發展出嚟,呢個係有據可依。」

想了解更多裝修行業資訊,請留意裝修佬專欄

原文連結

此文章由裝修佬提供

裝修佬致力於令香港沒有麻煩/爛尾的裝修,並提供免費度尺/報價及裝修防伏班,為傳統裝修及家居領域帶來新的變革。

如果喜歡我們的文章,請即分享到︰

留言

會員
我要評論
請按此登錄後留言。未成為會員? 立即註冊
快捷鍵:←
快捷鍵:→