設計名人堂 Pian 心繫室內設計 活用建材營造大熱輕侈北歐風

裝修佬話你知 於 21/11/2020 發表 收藏文章

「『家』係日常生活成日見到,一個立體嘅空間,佢會帶俾你每一刻嘅便利同舒服嘅感覺。」

Pian年紀輕輕,原來已在設計行業打滾了七年。從小就一心從事室內設計行業的她,畢業後到了一家設計公司工作,主要走Classic路線,Pian覺得空間不大,不能充份發揮到自己對設計的熱情。繼後到了現在的公司,整個想法與設計風格都大有轉變。

硬裝軟裝一手包辦 緊貼建材市場更替
「設計工程公司係一條龍服務,多咗設計一環。除咗硬裝,設計師會去care唔同嘅軟裝,例如窗簾地毯,甚至去到飾物嘅配襯都一手包辦,係成個氛圍嘅建構。」單位不只是一個結構,Pian視為它一個整體。

設計師最重要的是觸覺。Pian不愛死板,也不愛copy,本著好奇的心態,面對市場各種的挑戰。「好多設計師用開嗰種物料就會用落去,可能因為方便,有效率,但我想每個客嘅單位出到嚟都唔同,獨一無二。同時建材日新月異,所以我一定會定期renew返市面上新嘅產品,等客可以接觸得到又新又正嘅物料。」


(圖片說明:Pian所設計帶有典雅美的北歐風單位。)

大熱輕侈北歐風 大小單位勾勒典雅美
Pian有一門拿手的設計風格,帶有典雅輕侈味道的北歐風,在香港非常少見。「因為而家都多咗年輕人置業,佢哋都比較喜歡清新嘅風格。其實我哋所有風格都有,但自從post咗呢個風格後,發現好多香港人覺得呢種風格與別不同,情有獨鍾,漸漸比例就多左。」

不少人覺得典雅輕侈的設計風格只有大屋才能做到,但Pian告訴我們設計不是大單位的專利,只要以不同角度去思考和利用空間就可以。「要係細屋有輕侈嘅北歐風格都有辦法㗎!」

從軟裝入手,營造輕侈的設計風格。「首先細屋唔會有太多object,可能唔會有特色牆,多數都係喺牆同櫃面加細節,例如花線、金屬、雲石,玻璃等做點綴。另外,裝飾品、燈具、地毯同窗簾,都屬於highlight同eye catching嘅位,亦好容易營造到輕侈元素,就算茶几都好多類似嘅款式。」

小巧著重功能靈活性 大則著重傢俬調配
Pian公司領導著設計團隊,設計過大大小小的單位,明白要考慮的東西各有不同。「細屋當然要思考點樣慳位收納,唔好太焗促,所以多數都會係訂造傢俬,一件傢俬嘅機能性盡量多啲,彈性多啲,餘下嘅位置就可以諗裝飾。」

大單位就看重如何去活用散件傢俬建立空間領域。「大單位其實居住成員都差不多,但多咗空間,除咗基本訂造傢俬,會著重在散件傢俬嘅擺法。一個廳可能得一個電視櫃,就好靠其他散件傢俬去調整有成幾百呎嘅廳。唔係就咁放張三人梳化,例如要考慮埋品茶區,諗下designer chair要放邊等等。」

從設計入手減輕負擔 保持對美的追求
面對逆市,設計公司會否覺得較以往困難?Pian提出了令人意想不到的角度。「其實可以用設計嚟減輕budget負擔。例如特色牆唔一定要做全牆,櫃唔一定要到頂,唔係太實用的話做返矮少少都得。」

「又例如從建材嘅耐用度入手,考慮未來維修嘅花費。客人喜愛雲石,始終雲石會發黃,要悉心打理。但同一效果設計師其實可以有唔同取替物料,雲石紋嘅printing玻璃,雲石紋既牆紙、膠板都可以做到個效果。呢啲都可以從設計入手,保持住對美嘅追求,從而去考慮點運用budget。」

心繫室內設計 只為建造一個「家」
回顧自己七年的設計生涯,Pian無法想像自己不從事設計行業的話,現在會身處何方。「哈哈,真係由細到大目標一直都係呢一行,如果唔做設計師都可能係做project manager,點都會同裝修有關。」

為何如此執著?「『家』係日常生活成日見到,一個立體嘅空間,佢會帶俾你每一刻嘅便利同舒服嘅感覺。我好希望可以幫客人design到間屋靚同舒服,不單放工,放假都會想留係屋企,因為我自己就係咁!」

原文連結

如果喜歡我們的文章,請即分享到︰

留言

會員
我要評論
請按此登錄後留言。未成為會員? 立即註冊
    快捷鍵:←
    快捷鍵:→