讀男校時，我那吻過的男孩 精選

仲記得我個初戀拍緊拖嗰時寸我：「睇你個樣都係青頭仔架喇，嚟啦，等姐姐教你。」我嗰年正好十八，仲係青澀懵懂嘅歲月，冷不提防就係月影斑駁嘅樹蔭底下打咗人生第一次車輪。

到我睜開眼嘅時候，我女朋友笑笑口咁望住我講：「第一次算唔錯架啦，都有59分嘅~」我嬲嬲地咁望住佢，「你嬲個樣好可愛哈哈。係咪初吻呢？」佢用一副淫邪嘅眼神斜睨住我，我耷低個頭，因為其實我初吻係發生喺中三嗰年。

大風一揚，球場上勁草搖曳。當一大堆男仔係球場上拼過你死我活嘅時候，總有啲例外，就如我同阿政。當女校班妹妹仔成Q日借頭借路唔上體育堂嗰陣，男校嘅男仔一樣識。每每體育堂嘅時候，當大家都去踢波游水嗰陣，班房只得我同阿政兩個人，留係到唔上堂。
其實我開頭同佢一啲都唔熟，只係知道佢爸爸幾有錢，但一早已經唔係到，一直以黎都係由阿媽湊大佢，所以份人比較斯文，但係男仔堆入面個個都講女講波笑呵呵嘅時候，阿政就好似一股超然世外嘅清流咁，自不然會俾人誤會為hehe之流，基本上無咩事，大家都唔會打擾佢，生怕自己被當係「劍擊學會成員」。

直至有一次又到體育堂時，我睇書睇到一半，隨手放左係枱面之後去廁所。番到黎嗰陣，驀然傳黎阿政溫柔嘅聲線：「你都鍾意睇Nicholas Sparks嘅小說架？」佢眼神閃爍著光芒，好似搵到知音人咁，事實上我又真係Nicholas Sparks嘅Fans黎，於是我地兩個就開始有左個共同話題，多左傾計。
慢慢同佢接觸，發覺佢真係好特別。例如每日放學一定會馬上番屋企練書法，食完番飯之後做功課睇一陣書就訓教，日日幾乎如是。嗰種規律嘅程度好比軍訓咁款，但佢好似樂在其中咁。同佢傾計，就好似同緊維基百科講野咁，問咩都答到有紋有路，真係幾有趣嘅一個存在。To put it simply，佢展示俾我一個全新嘅世界。

時維五月，臨近我生日之際，有一日係抽屜中無意發現有份禮物，我拆開之後見到係True Believer，係Nicholas Sparks啱啱出版嘅新書。

一到左體育堂時，我行過去佢嗰位隔離坐低，想開口多謝佢時，竟然佢先一步開口：「我媽媽想我過去英國讀boarding。」我當下呆左一呆，成個課室只剩低時鐘多餘嘅啲嗒聲。有好多時候，我地明白作為細路係好難改變大人做嘅決定。佢慢慢伏低頭係到啜泣。我唔知點解見到佢側面，可憐得黎又有啲可愛。頭上嘅風扇仍舊轉動，窗外的陽光刺進百葉簾，抖落斑駁的光點。我輕輕把頭湊過去，吻了一下他的臉頰。
「使唔使諗咁耐呀你，係咪中學同男仔錫過呀哈哈。」我望一望女朋友，略帶沉重咁笑一笑，「唔—話—你—知。」