陳智燊與宋熙年

何君默 於 24/01/2018 發表 收藏文章
某一日Office啲三姑六婆又喺度睇緊報紙嗰陣時,見到陳智燊同宋熙年幅相,就喺度講:「真係鄧呀陳智燊可憐,娶咗個惡婆返屋企,注定一世俾老婆蝦啦!陳智燊咁高大靚仔又有錢,竟然會揀個咁普普通通嘅女人。」我望一望個班三姑六婆副咀臉,真係笑而不語。

由小學開始,我哋就讀過一科野叫常識;去到中學,我哋修讀理科嘅時候亦都有一科叫物理,兩科本身就係講解緊世界自然嘅定律。呢啲永恆法則,只要暫時無人可以推翻嘅話,就係一個通則,係世界通行嘅一個道理同法則。

但呢個世界有時候並唔係呢啲所謂嘅通則可以解釋得到,其中一樣就係愛情。當你行行下街嗰陣時,見到一個靚仔拖住條靚女或者一個醜男攬住一條丑女,你就會覺得理所當然。但當你見到一個靚女同一個醜男係咪埋一齊;或者一個靚仔同埋件豬扒一齊,你就會心諗:呀,究竟係咪其中一方有錢有權有勢先可以擄獲對方嘅芳心呢?我地喱個念頭已經係嘗試去rationalize哩個happening,去justify下哩個case以符合我地嘅常理認知。

愛情呢啲嘢往往好講緣份,並唔係常理可以解釋得到。就好似報業大王梅鐸一樣,佢嘅前妻係中國人鄧文廸。係英國國會聽證會上面,因為見到有人拎起裝滿剃鬚膏的紙碟想襲擊梅鐸,鄧文迪即刻一個箭步擋係梅鐸身前,仲摑埋示威者一巴,被傳媒冠以「虎妻」之名。事實上,係外人眼中佢老婆嘅強桿形象確實會令人為之驚恐,但係當事人梅鐸可能就係鍾意佢夠霸氣呢?正如惠子話齋︰「子非魚,安知魚之樂?」正所謂情人眼裏出西施,如果你唔係當事人,借問聲你又有乜嘢資格可以評論人呢?

搞到我諗起之前有個故仔,喺度講有人問禪師究竟點解啲男明星同女明星成日都離離合合,禪師淨係指住支叉,個善信就問佢,係咪表示愛情好似支叉咁,看似平淡無奇,只要堅持,就能堅固無比,之後禪師答佢人地嘅事,關你叉事咩。

我望一望班三姑六婆,笑笑口咁心忖「係呀,就係輪到宋熙年都未輪到你地呀,吹咩?」

如果喜歡我們的文章,請即分享到︰

留言

會員
我要評論
請按此登錄後留言。未成為會員? 立即註冊
快捷鍵:←
快捷鍵:→