挑，你地班後生，夠我地細個嗰時窮咩！ 精選

曾經喱個香港，係單憑雙手打拼，加上少少運就可以成功。

曾經喱個香港，我地以擁有誠信為傲，踞於亞洲，傲視同儕。

曾經喱個香港，只要一個老實人肯捱肯做，生活已經可以過得唔錯。

曾經，畢竟只是曾經。

每次有前輩寄語我地成班後生要博殺，少不免講一番當年威水舊史，然後就加番幾句「挑，你地班後生，夠我地細個嗰時窮咩！」 「唔好怕蝕底呀，唔好樣樣野計到足計到盡」「想當年我地讀完書番到屋企，哈，你估唔使做呀，有得揸住部IPAD 玩遊戲甘巴閉做低頭族呀，要幫阿媽手黐膠花架！」從佢嘅眼神我睇得出，到咗而喱一刻，佢都仲係黐緊。
因為我地已經活緊喺2018年嘅香港。

以前香港騰飛，有大英帝國健全嘅法治制度，加上華人嘅務實勤勉，先能夠喺上世紀七十至九十年代喺一個度度都未發展嘅亞洲獨領風騷。坦白啲講，係一種幸運，係上天對喱個小小漁港嘅一種眷顧，which we should never take it for granted.

但有趣嘅係，每當一堆「成功人士」講起自己幾有「獅子山精神」嘅時候，佢地面上流露嘅神采，據天功為己力嘅語氣，確實係幾教我地喱代人歎息。因為我地明白一個輝煌時代，一個絕佳時機嘅重要性。越南柬埔寨啲童工雛妓夠唔夠勤力？夠！怕唔怕蝕底？唔怕，因為佢地無得選擇自己嘅人生。佢地有無「獅子山精神」？梗係有！但各位看倌，你地覺得佢地嘅將來美好嗎？
時移世易，萬物更迭將會以幾何級數嘅速度進行，今朝你落去七仔仲有個收銀棟係到同係收下錢吹下水，有機會明日已經成間七仔變左無人自動化便利店。No joking，世界變遷之快將會係前所未有之快，其快將會不停重塑你嘅價值觀。你縱使再肯捱肯做，你又夠唔夠膽講你做野快過AI？

一代人自然會有一代人共生嘅思想，而因大部分人缺乏同理心，大家都好似活係平行時空，唔曉係人地角度去出發，只剩下標籤同教化，於是就產生咗所謂嘅「代溝」。

我平時返工好靜，因為要做嘅野真係唔少。仲記得有一次，有個Auntie級嘅同事睇睇下報紙，問咗我一條問題，「君默呀，點解而家喱一代啲細蚊仔咁唔成熟，郁啲就跳樓?」佢拋左一個其實自己都set咗answer 嘅問題俾我。平時都費事理，但嗰真係忍唔住，「即係咁，如果你係係單親家庭住劏房，呀媽有骨氣唔拎綜緩但上公屋就遙遙無期，你睇報紙知道有啲人一黎香港唔使點排隊就可以有間公屋，你發覺書本上教曉你人最重要嘅禮義廉恥同你係媒體同社會見到嘅人同事相悖，你即使努力讀書都好，無論你做咩都俾人話唔成熟同廢青，當你知道大學畢業之後你一身學貸，搵份人工仲好大機會同嗰個做清潔含辛茹苦養大你嘅阿媽相若甚至更低，當你已經見到社會同你前途已經希望渺然，咁你仲會唔會真係覺得而家啲細蚊仔唔成熟?」
縱然如此，我依然認為這是最壞的時代，也是最好的時代。或許我們認為身在香港，前方看不見路和希望，但請謹記 — 「希望本是無所謂有，無所謂無的。這正如地上的路；其實地上本沒有路，走的人多了，也便成了路。」但願大家都能創出自己頭上的一片天，共勉之。