與其同條女去遊埠鬧交,不如陪下老母去旅行

仲記得對上一次同條女打算去旅行,問佢想去邊,佢又話唔知。到我話不如求其去下長洲佢又發爛渣。到最尾就去咗東京玩。去到東京條女話想去築地,要試吓「壽司大」(因為佢成班8婆fd都去過),點知去到條龍長得滯,等兩三粒鐘,佢又發爛渣。跟住返到嚟香港,冇幾耐我哋就分咗手。

過咗差唔多五個月,見啲去台灣嘅機票有平,望到阿媽坐咗係梳化睇電視食緊花生,就順口問一問:「喂阿媽,有冇興趣去下旅行咁呀?」我呀媽就含住半粒花生咁同我講:「好呀,幾時啊?」

話說細個嗰陣,間唔中都會有同屋企人去下旅行,但係上到中學之後,屋企開支又大左,就少咗一家人去旅行。我老豆係唔係太鍾意去旅行嗰啲人,所以就連阿媽都差唔多有成八年冇去過旅行,今勻做下孝順仔,冇壞嘅,陪下老母去旅行。
同阿媽同埋同條女去旅行係一定有分別嘅,但係我真係從來冇諗過同阿媽去旅行可以去得咁過癮,咁開心。

我哋去台灣搭「因航」嘅,咁其實大家都應該知道「因航」啲空姐不嬲出名面口好西。我阿媽拎住袋野,啱啱入機艙嗰陣時,個空姐截一截停我呀媽:「麻煩出示一下登記證睇吓你坐邊呀唔該!」然之後我阿媽費事煩,直接同佢講:我36F呀,呀,唔係我36E,我個仔先係36 F! 我企左係隔離,望住我阿媽,當場呆左。個空姐又無啦啦陰陰嘴笑話:「我睇得出,但係都麻煩你出示番登記證啦唔該。」我之後拎返兩張登記證出黎,望住阿媽,有啲哭笑不得,但係阿媽好似完全毫不知情咁坐返埋位。
去到台灣當然不能免俗啦,去返啲專搵遊客錢嘅地方,就好似上引水產咁。其實都係來來去去啲魚生啊海鮮呀嗰啲野,但係見到阿媽都會食得好滋味咁。望住佢咁嘅樣,就搞到我諗起我前女友排「壽司大」嗰陣時個鳩樣。明明一碟我食到悶嘅吞拿魚腩,我阿媽都好似食得好滿足咁,咁見到佢滿足我都開心嘅。

係台灣返香港嗰陣時過安檢,發現原來佢唔小心執咗支洗面水係個backpack到,過bag嗰陣時個安檢人員同佢講話支野一定要丟,唔可以帶上機。我又係衰仔嘅,唔記得提阿媽over 100毫升嗰啲嘢唔可以拎上機。

正當我喺度自責嗰陣時,我阿媽竟然用唔鹹唔淡嘅普通話同安檢人員講:「但這支洗面很好用啊，可不可以不要丟?」當然今次我都成個馬國明咁嘅樣,真係唔知究竟發生緊乜嘢事。我就細細聲同阿媽講:「媽,呢招呢到行唔通㗎,最多一陣都我係免稅店買返支俾你好唔好?」我老母即刻笑番。
有時諗起其實阿媽又幾可愛嘅又易氹,或者呢啲就叫做返老還童掛。其實我真係幾慶幸有陪呀媽去旅行,且行且珍惜呀嘛。