2018年度第一本一定要放喺書架嘅書! 精選

2018年度第一本一定要放喺書架嘅書喺馬來西亞賣到斷市嘅 <郭鶴年自傳>。對上一次令到筆者咁廢寢忘餐睇嘅書已經係Dan Brown嘅 <Angels & Demons>。大概對於香港人喱一代,郭鶴年喱個名未必太熟悉,但如果講口述喱本書嘅主人翁其實係嘉里集團 (Kerry Holdings) 創辦人同香格里拉酒店 (Shangri-La Hotels & Resorts) 業務嘅開創人,相信大家會開始有啲興趣。
筆者啱啱用咗三日睇完呢本書。通常自傳就好Q悶嘅,但係呢一本書確實係幾精彩,作為馬來西亞嘅首富,出嘅自傳果然係有啲質素。就好似係香港,如果李嘉誠突然間出番本自傳,即使大家都知道佢係做塑膠廠起家嘅歷史,唔多唔少都有啲認識,但如果一講到佢自己親口講吓自己啲發跡史嘅話,相信大家都會有興趣買黎睇下入邊會唔會有乜嘢秘密或者獨特見解可以值得我哋去參考。

總括而言,本書大概有五點係令到人嘅值得反思同埋學習嘅:

1)日本人成功之道係紀律,唔單係聰明

本書嘅主人翁歸納日本人能夠取得今時今日嘅成就,最主要嘅原因係紀律而唔係聰明。郭老先生曾歷經馬來亞日治時期,佢提到認識嘅日本人,商人或軍人,都係無條件咁服從命令,即使佢地可能明知係錯。事實上,日本其實係一個深受深受中國儒家文化影響嘅地方,重五倫(父子，君臣，夫婦，長幼，朋友)而不允以下犯上。例如有學過日文嘅朋友就應該係佢哋語言嗰度可以發現有「敬語」(日文試必考)存在。
透過良好服從性,朝一個好方向發展對社會有廣大裨益,反之則為禍人間。

2)認清目標

每日嘅時間有限,每個人必須專注係自己人生上面,要及早認清自己專長,加以發揮並早立目標,唔好太過浪費時間去單純追求其他物欲,因為好多野只係奢侈同享樂嘅象徵,會令人唔記得生活最重要係做乜嘢。係老生常談但非常重要。

3)君子愛財取之有道

郭鶴年先生認為錢唔可以掙盡。筆者突然諗起嗰陣時中學讀書讀過一篇孟子同梁惠王傾計,梁惠王向孟子請教治國之道。孟子就話:「不違農時，穀不可勝食也；數罟不入洿池，魚鱉不可勝食也；斧斤以時入山林，材木不可勝用也。」用白話講就係凡事咪咁盡,啲飯呀魚呀海鮮呀就食到你唔L食,資源用到你唔L 用,大概孟子就係到同梁惠王講緊Sustainable Development。而當嘉里物流決定係1987年上市嗰陣時之前,本書主人翁佢竟將船運公司嘅股份拎咗15%出嚟分比董事會嘅成員,員工呀主管呀船長呀,令到更加多人受惠,真正體現左「君子愛財,取之有道」呢種社會意識,只有唔係一個自私嘅人,先可以令生意越做越大,sustain 落去。
4)受拒絕後仍要鍥而不捨

當主人翁每一次傾生意開頭比對方拒絕嗰陣時,佢都繼續嘗試用其他方法去說服人地。就例如當佢只係喺興建酒店香格里拉初期,佢去請教酒店大亨幫忙去管理酒店,當佢人地第一次拒絕佢嗰陣時,佢冇因此退縮,反而嘗試用其他方法同態度去將之說服,然之後先能夠達致今日香格里拉係全球咁多地方都有酒店網絡嘅成就。有時一句唔放棄,一塊厚面皮,先可以係引領你去成功嘅路徑。

5) 簡單就是美

主人翁曾經講過佢從來未學過酒店管理,就好似李嘉誠都未學過商業管理一樣,但係佢嘅家庭同埋學校令佢明白生活入邊每一件事都應該去簡化,因為假如令事情變複雜嘅話,就會作繭自縛。勿忘初心,任何一個大嘅問題或者大嘅難關,都可以將之分解為小嘅問題同細嘅難關,然後就可以逐一破解。

睇完喱本書,我不禁係到諗: 如果每個人到人生盡頭都要寫本自傳嘅話,唔知你又可以寫到幾多頁呢?