不坎回首之柒事一則

是咁的，當老孫仲係學生嗰陣，突然有一日訓醒覺得背脊好很痛，頂左幾粒鐘，最後痛到行唔郁，結果入廠收場。
原來，老孫個肺爆撚左而不自知。

雖然老孫情況唔算嚴重，但係都要留院一星期。無端白事爆左一邊肺，攪到無厘頭入廠。當時思想仍然極度小學雞嘅老孫，頓然發瘟，覺得自己變左好撚悲慘嘅韓劇主角，「點解無啦啦俾單杰野我嘆？有冇咁黑先！我又冇做埋晒d傷天害理嘅事……依家女又溝唔到，六合彩又唔中，衰野就中晒……(下刪一萬字)」

不過，老孫留院住嗰間公立醫院大房，就令到老孫呢d咁戇鳩嘅小學雞諗法瞬間消失。

首先，住喺老孫對面床位嘅壯年男子，喺老孫留院第一晚，半夜三更俾人推走左，幾粒鐘之後返到上嚟，就已經見佢得番一隻腳。原來，佢隻腳中左D無名腫毒而入院(無記錯係喺強國賴嘢返黎)，攪到非鋸不可。呢位人兄嘅屋企人喊爆病房，不過佢自己就一滴眼淚都冇流過。
跟住第二朝，老孫一訓醒，睜開雙眼就已經見到醫生同護士搶救緊隔離床位個阿伯，唔夠一分鐘，個阿伯就已經返魂乏術，瓜左，轉頭已經有人同佢打包。

呢d 畫面，對第一次住院嘅老孫嚟講，真係好撚震撼。同時，老孫即時驚覺自己有幾咁柒，對比起人哋嗰d猛料，你呢d 真係雞毛蒜皮、碎到唔碎嘅碎料。老孫覺得自己真係柒過關家姐，幾乎想即時抆喉走人，怕自己呢d 碎料阻住公立醫院寶貴嘅床位。

柒事雖不坎回首，卻有回味嘅價值。當你以為自己好撚慘情，全世界最不幸嘅人就係你嘅時候，就應該熄自己機，抽離一下，踏後一步去睇件事，望一望大把人遭遇更慘情、身處環境更惡劣，都冇自暴自棄，反而咬緊牙關積極奮戰，樂觀面對，你就會明白最慘嗰個唔係你，最柒嗰位就有你份。
呢個世界，應該冇人想做最柒嗰個呱？

－－－－－

P.S. 支持老孫創作，就請開心Share啦！

Into The Darkness 入黑圖文
更多精彩內容: www.facebook.com/intothedarknesshk