為何要玩閹？

「玩閹」，乃係男士們小學雞時代必然玩意，喺成長過程中，兄弟們必定經過一次又一次閹割嘅洗禮，至可以茁壯成長。
【Into The Darkness入黑圖文】有好多男讀者，相信佢地都會明白玩閹呢項運動競技箇中嘅奧妙，我地渴求一擊即中帶嚟嘅無比滿足感，與此同時又要擔心防唔住對手嘅攻勢而要承擔中招嘅惡果。所以，呢種運動除了講求攻守兼備嘅搏擊技巧，亦都好考運動員嘅臨場分析同決策能力，以至心理質素，尤其係當敵眾我寡嘅時候，如何做到「橫眉冷對千夫閹」，有著「今次肯撚定碴都冇得剩」嘅覺悟。

「玩閹」者，自己受靶機會可謂50/50，女生們或許永遠唔會明白麻甩仔點解對玩閹樂此不疲。問男生，可能佢地都唔會有答案。或者，呢樣野係本能使然，雄性動物往往想跟更多嘅雌性動物交配，所以將愈多競爭對手KO，跟愈多雌性交配嘅機會就愈大。因此，雄性小學雞喺繁衍本能驅使下，就抱住「閹得一個得一個」嘅心態，全情投入呢項競技。
當然，當小學雞變成中學雞、大學雞後，佢地逐漸認識呢個社會，累積更多「人性」後，便會慢慢忘記呢種動物嘅本能，從「玩閹」運動中退役。想同更多雌性交配，佢地會向住金錢、權力同地位呢d更人性化嘅方向發展。

雖然已經退役多時，但每當老孫回想起自己嘅運動員生涯時，諗起對手涼薄、刻毒嘅招數，諗起呢項運動嘅淺薄、無知、冷血、涼薄，都會倒抽一口涼氣，唉!


Into The Darkness 入黑圖文
更多精彩內容: www.facebook.com/intothedarknesshk