[KJFOODLIFE 太子] 超香椰子文昌雞鍋 北海道海膽煲仔飯


真係好耐都無打過邊爐,今次試下個清清地既椰子雞鍋,去左太子附近,原來開左間都幾大間既火鍋度,就算一大班人都坐得好舒服。



一上去就見到樓梯已經好有設計感,成個書櫃咁好似魔法片果啲場景咁,再上去大堂都幾闊落,仲有個英式電話亭。






今次我地坐左出面,都見到已經有一排sofa位,行左入去去洗手間果時見到原來勁大間,仲有一啲位間左出黎,都有少少私人空間。入面仲有個魚缸位,見到入面好多新鮮海鮮。





店舖都有唔少有特色既裝飾,好似牆身有七彩既碗碟砌左出黎,仲有唔少其他裝飾好似書呀,路牌呀等等。




好特別咁用左花生黎做筷子墊,呢個真係好有創意,另外餐紙墊就有唔少既詳情,有講到文昌雞既詳情,同埋椰子等等有益既地方。







先送上調味料,有專俾雞點既醬汁,仲有青檸辣椒等等可以加埋落去,《原味海南椰子文昌雞鍋》($128/半隻)個鍋入面就有椰子放左係度,一打開已經勁大陣清香椰子味,之後落埋雞落去再等個漏斗倒數完就可以食得。



呢個見到介紹勁得意,《自採溫室豆苗胚》($38),日本直送真係成個咁拎出黎,四四方方咁原個豆苗胚夠哂新鮮,仲可以即時剪即時淥。



緊係唔少得要叫最鍾意食既《紫菜響鈴》($48),外面炸得香脆,而入面包左紫菜更有香味,淥一淥索埋啲椰子湯更好食。




另外一個《文昌鴛鴦拼盤》($72),用左個架裝上面有隻雀仔裝飾好別緻,入面自家手作水餃拼四季福袋,水餃包左蝦夠爽口彈牙。





唔少得要叫《四季牛肉拼盤》($358),拼盤超豐富有安格斯牛頸脊、A4和牛肉眼、黑安格斯牛小排、牛舌、牛柳粒款款牛味濃郁,加上椰子雞湯更清甜 。




夏天特別既《北海道海膽煲仔飯》($338),夏天季節用上馬糞海膽同紫海膽,配上招牌煲仔飯,熱力溶化海膽撈匀食,加埋最後最愛食既飯焦一齊食。



熱辣辣緊係要飲凍野,《椰青沙冰》($42),真係一個大大既椰子,入面有椰子水,加上凍冰冰既沙冰夠哂解渴。


店名:四季文昌
地址:旺角荔枝角道33號百匯軒地下及1樓全層

即刻入去Like & Share埋我地既其他頻道:
Facebook: KJFOODLIFE飲食玩樂地圖
Instagram: KJFOODLIFE
Website: KJFOODLIFE飲食玩樂地圖
Openrice: KJFOODLIFE

歡迎合作或查詢:
Email: kjfoodlife@gmail.com

如果喜歡我們的文章,請即分享到︰

留言

會員
我要評論
請按此登錄後留言。未成為會員? 立即註冊
快捷鍵:←
快捷鍵:→