港女港結婚

Korean Gears For Life 於 30/01/2016 發表 收藏文章
港女港結婚


利申:小弟本身對港女(或呢個詞彙)真係冇乜偏見!

港女唔單只代表香港女仔嘅權力特徵,更加代表香港女性喺香港有一定地位,好似王迪詩話齏,“港女”係一個Brand,係好嘢嘅~

結婚,都係好㗎!

我不嬲都好鼓勵啲男女朋友快啲結婚,搵啱人咪結囉,好合理吖~

不過,小弟最頂唔緊嘅係⋯⋯「港女趕結婚」

唔知由幾時開始,香港人對結婚買樓產生咗一種迷思,搞到你唔結婚、唔買樓,就係失敗嘅人生⋯⋯

最難頂嘅係,有啲「港女」喺廿五歲打後,就會不斷提住幾時幾時之前一定要結婚。

「死啦,三十歲前都結唔到婚點生仔!!!!!?」

「死啦,拍咗咁多年拖,再唔結婚就散㗎啦!!!!」

或者有啲再「結婚-Orientated」啲,

「唔結婚,咁做咩要同你拍拖??」

當然,To be fair,以上嘅情況一樣會喺某啲男性身上發生,甚至更離譜:

「唔生仔,做咩要同你結婚??」

有啲朋友結婚幾年之後開始造人計劃,每晚差唔多鐘數就同老婆講(真人真事):

「老婆,夠鐘啦喂,嚟啦喂⋯⋯」

而老婆喺做嘅中途:

「得未呀,快啲得唔得⋯⋯」

嗰種夫妻之間嘅愛真係濃厚到呢~~

我諗,呢啲都係歸咎於男性要播種嘅天性。

講都底,我都係一條狗公,憑什麼去批評港女⋯⋯?

冇錯啦,我真係冇資格⋯⋯

之不過,眼見身邊有啲港女朋友,為結婚而結婚,冇晒底線,真係睇唔過眼


個Situation係咁:

港女特徵男女Day 1以結婚為前題拍拖;
兩年後籌備婚禮;
原本港女朋友梗係想要最港式嘅結婚,一大班兄弟同姊妹玩玩玩到落婚宴結束;
但係男方話佢班朋友靠唔住,冇兄弟,所以,都唔俾女方有姊妹;
原本港女朋友有大班親朋戚友一心諗住去酒店擺酒威威;
但係男方話結婚係兩個人嘅事係睇將來大家一齊開心嘅生活而唔係結俾人睇所以決定喺間好少少嘅酒樓擺一切從簡;
等等等等⋯⋯


港女朋友本身港女到爆,梗係喺班朋友數臭男友啦~

但係去到尾點都要自圓其說,講番佢男友好說話⋯⋯

即係咁,你班花生友肯很定喺度諗:「頂你,呢啲咪真愛囉,肯為對方犧牲wor~」

係呀,不過婚都未結就咁大犧牲,結左之後仲得了!?

認真,結婚係大有大搞,細有細搞,冇錯⋯⋯

⋯⋯但係,乜唔係應該兩個人一齊compromise一個屬於兩個人嘅婚禮咩??

好可惜,呢位朋友為咗「結得成婚」,真係咩都制⋯⋯

講到尾,點解要趕結婚?

「”要”生仔丫麻!」

你好鍾意小朋友咩?

「兩個人一齊就要結㗎啦,開心啲丫麻⋯⋯」

咁你同佢一齊好開心咩?

「我覺得我好就佢lor,又為咗佢xxx,又幫佢xxx⋯⋯,我諗我都叫做愛佢lor~~~」

哦⋯⋯ 明晒!

留言


請按此登錄後留言。未成為會員? 立即註冊
    快捷鍵:←
    快捷鍵:→