韓國留學生活(1) – 犀利呀韓國日記 精選

韓國留學生活(1) – 犀利呀韓國日記

近年韓流襲港，無論係韓劇，韓星定係化妝品，相信大家都知唔少。

亦都因為咁，愈來愈多香港人想去韓國留學同工作假期

韓國留學生活其實黎呢邊留學既申請程序唔算複雜，不過過黎呢邊生活，絕對唔係識講幾句안녕하세요就可以既事。

所以，係決定之前，不妨停一停，諗一諗。

首先，你要問下自己：

「究竟我係想過黎留學定係工作假期呢？」
兩者既分別係前者就只可以讀書，後者就可以讀書同打工兩樣都做得，雙方各有長短⋯⋯

⋯⋯而我，就選擇左以學業為主既留學。

韓國留學基本分三種：

語學堂既短期課程
長期課程
大學學位課程
大學課程只適用於已經考左韓語能力評估試既朋友，間間大學要求唔同，係大學既官網就可以搵到相應既入學要求。

至於一般韓國語學堂呢，其實就係教你韓文既課程，短期課程一般係夏天同冬天先會開班，大概兩星期，教你基本韓文同帶你去體驗下韓國咁啦。
而我讀緊既長期課程呢，就係三個月為一期，分春、夏、秋、冬四期。

教學內容就會深入好多，讀寫聽說文法都要學，一日上四小時堂，仲要定期考試。
長期課程既可以學得深入啲又可以體驗真正嘅韓國留學生活係點，確實係幾吸引既~
想讀既話，只要你中學畢業就可以係網上申請入讀。

雖然語學堂都係隸屬大學既，但唔算係當地既大學生。不過，係讀完語學堂之後，升讀韓國大學亦比較容易，所以近年都多左好多人揀去韓國升學。

有興趣既話可以上韓國大學既網頁睇下，大學既網頁有英文版。至於中文版呢，基本上出名既大學都會有既，所以都唔洗擔心睇唔明。

又或者繼續留意我，黎緊下篇會再講多啲申請細節同過程，有興趣想去韓國留學既你記住睇啦！