老母，你係咪白痴嫁？

老母，你係咪白痴嫁？


是咁的：

我係西鐵總站紅磡上車，對面坐咗兩母女。

細嘅，一坐低就攞本功課出嚟做，大嘅，一坐低就攞住份應該係啱啱派返落嚟嘅考試卷。
見到呢一幕，我個心揪左一下。

我嘅視線不斷係佢兩母女間徘徊，呀媽睇到條眉就黎變一字，呀女做到對眼就黎變鬥雞。

「呀女你係咪白痴嫁！」

嘩。呢一句說話同「特首地位係超然」有得揮，當堂嚇到我個心都離一離。

「呢題擺明送嫁啦！咁都錯？」

個妹妹冇出聲，望住份卷，個樣好內疚。

我個心，又揪多一下。

呀老母，如果你個女有你四五十歲嘅思維，我相信佢依加都一定諗緊
白痴

「老母你係咪白痴嫁？」

呀媽繼續講，呀女繼續做。

個老母將個女每一題錯嘅都講一次：「唉，唔係咁嫁，係點點點⋯⋯@#$%^&*(*&^%$」

由紅磡去到錦上路，妹妹終於哭了。

「喊係無用嫁！」

我個心，再次揪多下，好痛。

我忍唔住，企起身，指住老母個頭，大大聲咁鬧佢：「你係咪白痴嫁，無用！」

當然，我只係幻想當做咗，如果唔係你依加應該會係FACEBOOK見到一條「師奶大戰港女」嘅片。
“孩童只盼望歡樂　大人只知道期望“

其實香港嘅小朋友生存係香港嘅教育制度低下已經好慘⋯⋯

正苦呢頭賣曬廣告話孩子要有一小時玩樂時間，個頭話唔會取消TSA⋯⋯

老師個頭教完常識課，話夜晚要早啲瞓，呢頭就比咗堆要做到聽朝嘅功課。

淨返落嚟嘅父母親，可否守護子女的童年？

當子女已明白你們想他們成材的心時，你又可曾想過他們想要無壓的童年？

至少，唔好鬧佢白痴，唔好連喊都唔比佢喊。
真的，逼仔女係無用嫁，白痴！