吸引力法則如何令我成為通渠專家⋯⋯

Korean Gears For Life 於 24/12/2015 發表 收藏文章
吸引力法則如何令我成為通渠專家⋯⋯

前幾日送「貼廁泵」嗰陣,個客問我:

「咦~ 劉生,你喺咪就係拍片通渠嗰個⋯⋯」

嗰個moment,我知我好可能已經成為咗一個通渠專家⋯⋯

然而,不禁令我反思⋯⋯

「點解事情嘅發展會係咁?」

如果成日講耶穌嗰啲人,喺高登仔口中叫做「耶L」,咁小弟一定會俾人叫「吸(引力法則) L」(簡寫有啲不雅)⋯⋯

而,一個吸引力法則力L⋯⋯

⋯除咗開口埋口都講吸引力法則之外,重會成日諗點解我會吸咗呢啲嘢埋嚟。

之不過⋯⋯ 通渠呢樣嘢⋯⋯

我除咗諗到因為我由細到大都好鍾意講屎尿屁之外,真係諗唔到點解今日我會落得如此下場。

不過,吸引力法則其中一個重點係:

“Accept EVERYTHING the Universe gives”

即係個天俾咩你,你都要接受。

你愈接受得多,得到嘅會愈多。

所謂接受,唔係嗰啲口講「多謝你」,心入面「小7你」嗰種⋯⋯

而係真心感恩現在你所擁有嘅一切。

所以小弟雖然口裡說不,身體卻很誠實,義無反顧去扮演呢個各色。

當然,成件事喺咪完全喺小弟嘅預料之外呢?

都唔完全係嘅,小弟想要吸引嘅嘢,唔多唔少已經得到咗,或者已經慢慢嚟緊,通渠專家呢樣嘢只係一個副產品。

不過,我相信好多人入嚟睇呢篇文章,都係想知多啲點去用吸引力法則,又或者你自己用緊嘅吸引力法則又係咪完全啱呢?

喺度,小弟就share一下我覺得真係有用嘅心法俾大家啦:

  1. 要十分十分清楚自己想要嘅嘢
    想像自己呢個Moment已經得到咗呢樣嘢(不論喺畫面上、感覺上都呈現到出嚟)
    每當發現自己嘅想法同你想要嘅嘢有矛盾或有所出入,即時recall返自己已經得到嘅嗰種感覺
    持之以恆 — 因為大多數思想只係一種習慣,不斷灌輸新思想俾自己,就能替代舊思想
    為你即將會得到嘅嘢感恩(呢點最重要)

當然啦,吸引力法則唔係變魔術⋯

大部分時間都唔會即刻見到效果,不過你會發現你想要嘅嘢,往往會喺你從來冇預料過嘅方式、渠道出現⋯⋯

好似小弟本身喺另一個BLOG度都有寫開關於吸引力法則嘅嘢(用英文)⋯⋯

半年前,有個年輕英國少女email小弟,問佢點樣可以同佢最崇拜嘅ROCK STAR成為好朋友⋯⋯

如是者,我都係同佢講番上述嘅嘢⋯⋯

⋯⋯兩個星期後,佢reply返我:

「我去咗佢個concert,淨係同佢握到手⋯⋯:(」

我又再講番同一番說話⋯⋯

點知,今日我喺FaceBook見到,呢個女仔已經開咗自己嘅Concert,係一個主音。

佢有冇同佢崇拜嘅Rock Star成為朋友,我唔知⋯⋯

我淨係知道佢依家絕對可以同任何Rock Star做朋友(好似係)!

當然,中國人有句說話:「信則有,不信則無。」

吸引力法則,亦是如此。


信,不信,由你。
標籤: 吸引力  吸引力法則  

留言


請按此登錄後留言。未成為會員? 立即註冊
    快捷鍵:←
    快捷鍵:→