吉野家 – 情義結 精選

講起吉野家⋯⋯

一定要講番十幾年前仲讀緊Form 6嘅時候(留意番當時仲有中五會考同埋A-Level)。
每個星期六、日小弟都一定會去沙田自修室溫書準備A-Level(真係唔係為咗識女仔㗎)⋯⋯

窮苦學生，每個月得$1,000零用錢，平時午餐多數都係食麵包，食得好啲，就係等3點鐘去吉野家下午茶，食個當時只需要$15嘅細牛肉飯⋯⋯

當然，識食嘅小弟，唔會就咁食啦⋯⋯


仲記得當年有間唔屎睇下Smap x Smap嘅節目，其中一part係要佢地5條友估下，嘉賓最喜愛嘅食物係咩⋯

⋯估中咗，就可以同個嘉賓一齊食嗰道菜。

有一集，嗰嘉賓最鍾意食嘅竟然係吉野家嘅牛肉飯⋯⋯

但係，要將呢碗牛肉飯發揮到極致，嗰位嘉賓做咗以下步驟：

雞蛋撈飯先加少少七味粉(份量因人而異)再加啲牛肉汁
加少少少少量醬油
【重點】剝開一隻日本生雞蛋，喺個碟仔打勻佢，再倒啲蛋汁落碗飯度
撈勻佢
再加幾片酸薑喺面(以前係Pink㗎)


點食呢？

用匙羹舀起一羹飯，你會見到呢羹飯上面，每一粒米都會黏滿醬汁同蛋汁⋯⋯
喺呢一羹充滿汁嘅飯上面，舖一塊薄薄嘅牛肉上去⋯⋯
然後一嗒擺落口！
吉野家牛肉飯嘩，嗰種好味法真係唔係筆墨所能形容，好似睇食戟之靈咁，只能夠以爆幾多衫去反映佢有幾好食⋯⋯
再加上燈光同拍攝效果，你會覺得呢碗飯值10,000Yen⋯⋯



如是者，我之後去親吉野家，都會俾$5加隻生雞蛋，照板煮碗⋯⋯

「先生，吉野家好似冇得加生雞蛋㗎喎！」

係呀，喺我食咗幾次之後，就又禽流感又SARS，之後就冇再入口日本生雞蛋啦⋯⋯

不過亦都因為咁，而家我喺吉野家唯一會食嘅嘢，都只會係【和風牛肉溫泉玉子飯(細)加牛汁】，再落幾片酸薑(唔知點解依家係黃色，有冇人可以話俾我知)。

雖然，再食唔番以前嗰種味⋯⋯
⋯⋯但係，每當糧尾，又或者飢寒交逼嗰陣⋯⋯

吉野家，一定係首選！

・

・

・

正如⋯⋯我相信，每當廁所室左，「貼廁泵」都一定係你嘅首選！