即影・即有 精選

即影・即有


比起手機、相機等等嘅數碼產品，我更喜歡即影即有。
十六歲生日個年收到部即影即有

「嚓」「Ziii……」
由第一張起，我就已經注定呢世都返唔到轉頭。 打後每逢有咩活動，學校旅行…聖誕聯歡會…去長洲…(嗰陣覺得去長洲已經好遠, 雖然依加都係)…

總之唔係平時返學放學返工放工返屋企嘅日子，都總會帶住部富士7S出街。

每次活動之前，總會問人：

「喂你買咗相紙未呀？」

「邊到買平呀？」

無論幾忙都好，都會仆去買返幾盒相紙。

對於嗰時仲係學生哥嘅我黎講，四十蚊一盒，十張嘅白邊相紙，已經係好貴…

貴都要買，並唔係因為想曬命(一部寶麗來都幾百蚊嫁，講緊仲讀緊中學呀)
而係基於我對即影即有嘅一份執著，一份鐘愛⋯⋯

即影即有影出黎個份真實，係智能嘢永遠唔能夠媲美

手機相機，可以幾秒內影過百張相，然後揀張最靚嘅

揀完之後…Photoshop..美圖…無數嘅filter無數嘅effect

到最後，張相仲係唔係當初你所見到嘅畫面？

其實你之所以會攞起部相機影，都係因為你想留住個刻肉眼所見嘅美麗啫(好似係)

「但係即影即有唔可以瘋狂影喎⋯⋯」
老老實實，你係電話將同一個畫面影幾百張相之後，

你又試過幾多次逐張逐張慢慢欣賞返？

即影即有，因為唔平，所以你更珍惜每一個快門

而每一張相，入面嘅畫面、入面嘅人、入面嘅事、入面嘅感受

都係曾經你最想最想留低嘅

「留住溫度　速度　溫柔和憤怒　凝住今日怎樣好…」

到某一日，你執屋時又好，特登拎出黎又好

你會逐張逐張，慢慢睇，然後個腦浮現出當時嘅畫面
「每張都罕有　拍下過記住過　好過擁有……」

即影即有，有時就好似人生咁…

影張相，要對好焦，較啱好角度，憑住一份衝動，一嘢㩒落去

張相出咗黎，影得好就好，唔好就唔好，無take two(有嘅，不過奢侈啲囉。)

人生亦然，要把握時機，調整好心態，憑住一份衝動，一嘢轟埋去

事情完結，做得好就好，唔好就唔好

只係，一生人做咁多件事，又有幾多次可以Take Two?
即使take two，畫面，意義亦已截然不同

但相同嘅係，係好係壞，都係一個紀念，又或者係一個教訓

“影得差唔代表哂咗張相紙，做得唔好亦唔代表虛耗咗人生。”

唔好後悔自己曾經嘗試將最美一刻留低，亦唔好錯過可以製造最美一刻嘅機會。


「拍著照片一路同步　坦白流露感情和態度　其實人生並非虛耗」

願我不要忘記當初這份態度。

P.S.唔係賣緊廣告…只係因為最近購入咗兩部寶麗萊以至有感而發…

或者你睇完篇文真係會有興趣買嘅…


左邊係懷舊二手店買，相機250蚊，相紙158蚊一盒8張…

…都話我返唔到轉頭嫁啦

P.P.S. 真係唔係賣廣告，只係想分享下…