人生第一次見輔導（一）：你對自己唔係咁公道

儲足勇氣十多年，終於人生第一次去見了輔導。
第一次見面時間比較長，大概個半小時，約兩節（不過感覺時間過得非常快，有人願意聆聽的感覺真的很好）。初次見面，姑娘主要問問我的背景，和了解我對於輔導的期望。我的人生無論是寫的、講的，都已被反芻過無數次，所以對我來說分享並不困難，不如說我很習慣和陌生人傾訴，尤其對方還是專業的。

完了後，社工朋友問我：「有冇something new？」
我說沒有。
都是些舊問題，而且是困擾我多年的東西。

譬如姑娘對我說：「你有冇發覺其實你對自己好唔公道？你面對嘅困難係真實存在，就好似你真係喺飢餓當中，但你仲要唔畀自己嗌餓，你不斷壓抑自己。人同人之間嘅關係係雙向，你唔可能單靠自己就製造到食物同營養，以為只要自己忍住，或者再做好啲件事就會好。」
聽到這裡時我已經眼濕濕，我說：「明明大部分人應該都係自私，通常都係待人以嚴，律己以寬而為人詬病。但唔知點解我對自己真係好harsh，我都有留意到呢個問題，仲諗咗方法抗衡，就係用第三者嘅眼睛看待自己，或者當自己係其他人，盡量客觀啲，但有時真係好難。」

「你唔需要怪自己，呢個可能係你一直以嚟受到嘅training或者係你train返嚟嘅模式。你嘅生命可能有好多時候太多嘢控制唔到，變咗你只能調節自己，如果唔係解決唔到啲事。」

聽到這裡時我忍不住哭了，好像一直以來的委屈終於得到正名。也明白自己會這樣的原因，對呀，我不對自己harsh的話，就是現實會變得很harsh。我必須要很用力，才能安然度過那些日子，但是呢，現在也該是時候學懂放鬆一點了。
姑娘又對我說：「你習慣將問題歸咎喺自己度，可能因為噉比較能control，你個人會安心啲。但其實一樣嘢會發生，背後係牽涉無數咁多嘅因素，當你只係擺喺自己度嘅時候，反而會睇唔到個真相。」

「其實我明白，但我總係下意識會噉做……」

「有時就係噉，我哋個腦同個心唔通。但唔緊要，跟住落嚟我會慢慢同你一齊行，我哋慢慢探討，睇下可以點樣做或者提高個awareness，好冇？」

姑娘很溫柔，一邊聽我說話時會釋放共情訊號，與此同時飛快地寫下記錄，雙眼總是看着我，適時給予有建設性的回應，和初中時見的社工完全不一樣。她讓我稍稍放下了心，雖然沒有something new，卻是個能溝通，彼此接通在同一平台上的輔導員。
並且這個輔導員除了在心靈上與我同行，還很實際地給予了我支援：「社聯而家有筆資助，可以津貼最高$7000，聽完你嘅個案都適合，你要唔要申請？」

就這樣，本來讓我掛心的費用問題居然就這樣免去了！這個時候又覺得，上天還是待我不薄的！

下次見姑娘會在月尾，屆時再和大家分享！