她擁有我所沒有的「無雜質」靈魂

餐廳中，我對面坐着一位有點知性的女生。她戴着眼鏡，皮膚幼細，臉上並無妝容，很乾淨白晢的一個人。她正在對我訴說關於自己如何從記者轉行到從事環保NGO團體的過程。
「我唔係一個可以問尖銳問題又或者轉數好快嘅人，後來做咗半年就quit。輾轉之下搵到而家呢份工，冇諗過又幾適合自己。」

「最緊要了解自己，每個人都有唔同位置。」

真的，像我就沒有辦法早睡早起，抗壓力也一般。可是漸漸知道沒有一些大家都認可的優點也不緊要，重要的是清楚自己的特點，然後運用得宜。習慣飛翔的人為何要參加跑步比賽呢，游泳健將走去爬樹當然只得平庸成績。

「做做下環保，發覺自己對呢方面都幾有興趣。」
「我反而想問下，香港啲回收係咪真係有回收？我聽講好多其實最後都係送咗去堆填。」

「係有呢個情況，但都好多真係有回收。其實有求就有供，而家係有下游，綠在區區都真係做緊環保嘢。例如我之前參觀過『劉財記紙業有限公司』，其實佢哋機器一個鐘可以處理一公噸廢塑膠，但而家每個月只係收到二十至三十公噸，回收量遠遠不足……其實只要每人做多少少，已經爭好遠。」

我一向不是環保人士，對這方面也沒有太關注。環保對我來說太遙遠，從來不是我生命中重要的東西。

「我曾經有諗過喺屋企附近開間祼買店，後來發覺原來就算係屋企附近嘅噏耷商場租都好貴。而家退而求其次，做住團購環保產品先。」我莞爾，租金昂貴可說是香港一直以來的標記呢。
眼前的可人兒續說：「其實我對環保嘅觸覺係好受兩間店影響，一間係二手衫店，老闆會歡迎人哋寄賣，佢會check品質同牌子；一間係護膚品店，佢哋會做祼賣。我覺得買一樣嘢唔應該單係因為佢平，我會睇埋質素同佢背後嘅理念。」

然後她和我分享了一件事。

「喺二手衫店嘅時候，我曾經買過一條褲，大概二百零蚊，然後有一日，我行葵廣竟然見到同一條，佢係新嘅，而且只賣幾十蚊。當刻我心情有啲複雜，但後來我諗通咗，我覺得錢唔係最重要，至少我挽救咗條褲，同埋我畀嘅錢都唔淨係嗰條褲，而係支持間店。」

我忍不住說：「可能我衰，我第一時間會諗間舖有冇呃錢。」
她有點意外，後來說：「應該唔會嘅，間舖入面都有啲牌子嘢，賣得比較平，只係我咁啱揀嗰條冇牌子。同埋個老闆係同事朋友，都信得過。」

呀，我終於知道自己心裡微微的奇異感是甚麼了，她是我見過少有的又pure又true的女生，彷彿世界從未被污染，裡面沒有不好的人和事。

「我傾偈成日咩都問，如果你介意可以唔答，我OK的，可唔可以問下你屋企係咪屬於中產？」

她坦然地說：「係，屋企雖然唔係超有錢，但都唔需要擔心錢嘅問題。」

果然，凡事也不會毫無因由。

她怯怯地問：「你係咪覺得我……好離地？我啲同事有時都會話我好天真……好易畀人呃……」
我趕忙搖頭：「NONONO，我反而覺得你好難得。個世界係大染缸，難得你仲可以有赤子之心，唔係容易嘅事。當然，防人之心不可無，自己都係要小心。」

「但我有時都會想自己可以成熟啲……複雜啲？世故啲？總之唔好好似而家咁一張白紙。」

我笑笑：「呢樣嘢並唔難，等你受嘅教訓多咗，你自然會學識，到時你想返轉頭都唔得，不如好好珍惜而家嘅自己。」

回程時，她還是有點苦惱。我再三對她說，順其自然就好。我很慶幸世界有像她這樣的人，這樣的人才會有餘裕考慮崇高的事，像我永遠都只在想今天自己可以如何活得更好一點。我這一生人從未考慮過太多環保的事，明知要支持本地菜，但價格真的讓我卻步，最後還是只以價錢考量。
我和Y小姐說：「呢個女仔嘅氣質真係嗰個環境先可以養成，我人生從來都冇咁pure同咁true過，我大開眼界。」

Y小姐贊同：「呢啲真係冇得扮，福份嚟。」

不過我也不羨慕，這個世界就是需要不同的人。

希望大家也可以好好喜歡自己，無論你是怎麼樣的人。