好的母親會保護你的童年

Charis Hung-Life 於 20/06/2022 發表 收藏文章

認識他已經八年,偶爾會在網上聊天,見面的次數不多,每次都是他請客,常聽他說轉工或是升職,網上也多是他吃喝玩樂或最近嘗了甚麼新嗜好的近況,所以我一直以為他是富家子弟,直至我們真的坐下來詳談他的成長,我才發現原來裡面有天大的誤會。

現年28歲的他,近十年才慢慢發掘到家庭的秘密,即是他成人以後。 他笑着說:「我講咗個結論先,我老豆係個壞人嚟。」

然後他徐徐說起往事: 「細個我一直以為屋企好窮,爸爸係做裝修、苦力、清拆嘅工作,媽媽當時冇做嘢。我哋一家住喺百零尺嘅房,後來細佬出世,先開始搬入大啲嘅村屋,叫做正式有個屋企。幼稚園嘅時候我見過一次父母打交,當時我以為係媽咪唔好,因為爸爸平時對我哋好好。小四嗰陣媽咪開始會幫附近嘅工人包括的士佬、車房嘅人煮飯賺錢,大概一星期三日,但我哋屋企仲係好窮。中一嗰年爸爸要做個大手術,嗰年係我人生最窮嘅一年,爭啲以為屋企會冇錢開飯。」

窮雖然可怕,但真正令人更心寒的,是你發現原來自己其實可以不必如此貧窮,卻切實地過着窮困的生活。
「大個之後我先發現,原來爸爸係搵到錢,只係佢唔將啲錢洗喺屋企。佢八至九成嘅錢都係洗喺自己同埋其他女人身上。 原來我爸爸係player嚟,喺我未出世前已經有其他女人,我媽咪冇幾耐就發現咗,我就到中三嗰時撳撳下爸爸部機見到其他女人嘅message先知。都未完,我爸爸好擅長問周圍嘅人借錢,仲要呃到人哋層樓都按埋,但從來唔還……」 我的腦海閃現了偉的「憑我本事借來的點解要還」Whatsapp對話圖,這個世界仆街真的能超乎你的想像,有些人確實是沒有良心的。他終於發現原來家裡的洗費大多由母親張羅。

「我同細佬細個從來未去過旅行,講起都羞家,我哋以為去轉旅行要十幾萬,後來發現爸爸成日同啲女人去日本旅行。」我也是到了大學時才問傳道人借錢去了第一次的旅行,旅行雖然不是必需品,但當出國成了一件普遍的事情,而未曾起飛見過外面的世界就仿如井底之蛙,漸漸成了貧窮子弟的陰霾和自卑的來源。

「2015年爸爸開始唔喺屋企長住,話就話係出去做嘢。起初一星期返嚟一次,後來變成兩星期、一個月……我都就快唔記得自己有爸爸。有次表弟中風,開咗兩次腦,第二日轉咗入ICU,爸爸話自己喺橫琴,但好快就過到嚟,嗰時我就知佢講大話,後來真係check到佢其實住喺九龍城。」

之後他成為了父母之間的橋樑:「我會問佢拎家用,但當然係愈畀愈少。我讀Asso嘅學費都係自己畀。」

2016年時,父親反問他:「我都唔喺度住,點解要畀電費?」 他說自己第一份工作月薪只得萬頭,實在不足以支撐一頭家:「當時我諗自己係有少少抑鬱,有時會呼吸困難同冇胃口。」幸好還有信仰成為他的力量,再後來他轉了工作,人工多了一倍,生活才比較輕鬆起來。

2017年時他的母親意外跌斷了手,需要人照顧,他們希望父親能回來幫忙。父親雖然回來了,態度卻很差,並留下了很難聽的說話:「你哋要我返嚟都只係因為錢啫。」然後每次放下$100或$500便會離開。他忍無可忍,終於一次大罵父親,父親便說要與他脫離父子關係。他的父母後來也正式離了婚。

他說近這些年和母親說開了,才知道父親一直如此,並非突變。

「原來以前媽咪買衫畀我哋,係要同爸爸claim錢。跟住家用又成日遲畀,但嗰時爸爸係話媽咪煩,話自己唔係唔畀,只係遲啲啫。有時遲遲下,可能遲咗成個月,噉係有畀定冇畀呀?大個就會知呢啲係歪理,細個唔會識。同埋爸爸好偏心我,有時出街會帶我唔帶細佬,好彩媽咪喺中間調和,先令到我哋兩兄弟冇缺裂。」

回想起來,他說母親從一開始便是非典型的母親:「我記得細個讀書,有次測驗全班都考到90分或以上,得我80分,佢冇話我,只係話我學識咗八成嘅嘢;有次我測驗全班最高分,有60零分,佢亦冇讚我,只係叫我記得我仲有四成嘅嘢係唔識。佢教我唔需要同人比較,分數亦唔重要,只係話畀你聽而家學習去到咩程度。仲有,佢話我知表達嘅重要性,會訓練我想要嘅嘢要開聲為自己爭取。」

他曾問過母親為什麼從前都不會向他們訴苦,只是默默承擔一切,然後他的母親講了讓我現在聽來都覺得感動的話:「童年過咗就過咗,大個就算變得幸福都追唔返,所以我想盡量令你哋嘅童年過得開心!」

他說自己比起同齡的人可能更早成為一家之主,因而變得成熟:「但有時都會覺得好可惜,其實我好想試下周圍去做唔同嘅嘢體驗人生,例如試下去做7仔或者去迪士尼打工。」當然,他只能想想,他並沒有能嘗試這些的餘裕。

「我問你,如果第時你爸爸病咗,例如有癌症,你會唔會理佢?」 他笑笑:「我真係有同媽咪傾過呢樣嘢,媽咪話唔可以抺殺爸爸過去嘅好,佢都唔係冇付出,所以我哋共識係唔會畀佢餓死,但都唔需要對佢太好。」

說真的,他的爸爸真的很爛,可是媽媽很讚呢!有這樣的母親是人生一大幸福和幸運。

如果喜歡我們的文章,請即分享到︰

留言


請按此登錄後留言。未成為會員? 立即註冊
    快捷鍵:←
    快捷鍵:→