不知道為什麼，這次見完姑娘後有點疲累。
或許近來忙碌，而見輔導本來就是件需要花費心神的事情，回家後腦袋一直不太能運轉，我也就把工作先丟到一旁。
慶幸自己有這樣的空間。
每次輔導，姑娘都會先和我閒聊一會。
我和她講起上次會面後的update：「食嘢嗰度雖然冇咩大改善，不過都冇差到，so far so good。廁所問題我有聽你講，喺輕鬆嘅場合減少去，盡量感受下其實情況冇我想像中嘅壞，容讓嗰種不受控存在耐少少。嘗試嘅時候都係有焦慮嘅感覺，但我好開心自己能夠有空間去試，冇咗以前嗰種焦躁，以前淨係想快啲抺走呢樣嘢。我開始冇咁驚，可以望多啲佢，了解下佢點形成，因為我知道自己唔係一個人面對。萬一有咩事，我都可以同你分享。」
我覺得見輔導其中一樣令我轉變最大的，是它給予了我正視恐懼的勇氣。我有信心崩潰時，眼前這個專業的人能幫助我一同拾回碎片，然後我會變得更強。
姑娘微笑說：「係咪好似以前將佢擺到好前，放到好大，被籠罩住唔知點算？但而家你可以行遠少少，反而望得更清？」
「係，同埋其實愈大之後，我已經好少同人講呢啲事。但同你傾完之後，我有寫出嚟，然後有人同我分享佢哋類似或者比我更嚴重嘅情況，我就發覺，其實大家都係噉，人哋都活得唔錯呀，我都應該可以。而且身邊嘅人都好接納我，令我放鬆咗唔少。」
「係呀，其實每個人都係唔完美。我都有我嘅問題，不過喺呢度唔可以同你分享咋嘛。我留意到你之前成個人都好緊，而家好似鬆咗啲。你今日有咩想同我分享？」
「我想同你分享最近浮現嘅兩個問題，係我以前冇為意，但其實重覆發生緊嘅事，我有啲迷惘，想同你傾下，亦想知道自己點解會噉。」
我調整一下呼吸，開始慢慢講起。
「對於拍拖我一直都有個concept，就係人會睇外在（唔單純講緊樣）好正常，我覺得話拍拖淨睇內涵嘅人好虛偽，冇人係唔睇的，爭在大家條線喺邊。但係我發覺自己睇得嚟有啲問題，我好似唔係用自己嘅目光去睇，而係用人哋嘅目光睇返轉頭，即係可能有啲嘢其實我本身唔介意，但我覺得其他人可能會睇唔起或者恥笑，於是我卻步。
舉個例，我之前玩交友app，心目中列咗啲條件，例如樣、高度、職業、人工等等，我覺得pass咗呢啲其他嘢再慢慢傾，但其實呢啲嘢對我嚟講從來都唔係最重要，亦唔係我最在乎嘅嘢。所以我好戟，即係你話我本身鍾意靚仔，噉我堅持搵靚仔係冇問題（先撇除成唔成功嘅機率）。但我嘅情況係其實呢啲都唔係我揀另一半嘅重要因素，我最關注嘅係大家心靈能唔能夠溝通，當然我都睇外在，但suppose係過咗自己條線就OK，但我而家係不自覺考慮埋社會條線。呢種唔一致，令我好辛苦，同時呢種追求亦令我滑鐵盧，我上一個正正符合晒普遍社會覺得一個人「好」嘅條件，但其實大家根本唔夾成件事係唔work。
然後我同Roommate傾偈嘅時候，進一步發現自己都真係有啲奇怪，我同佢分享有時我好佩服啲朋友點解可以同一個醜樣嘅人一齊，我覺得佢哋一定係真愛，Roommate話街外人可能會噉睇，但朋友應該唔會。識你嘅人應該只會睇你嘅另一半對你好唔好，而唔會太關注佢外表，我當時有種當頭棒喝嘅感覺，日子耐咗其實我都係會比較在意對方對我朋友好唔好多於佢個樣，但我第一時間，又真係會睇咗樣先。於是我開始諗，到底我係幾時，又基於咩原因，居然將外表放到咁大？然後我諗返起細個嘅一啲事。
細個我成日畀人笑又黑又瘦，於是我知道自己係個醜樣嘅細路。大我兩年嘅家姐似爸爸，又白又靚，好多人都讚佢，爸爸喺香港返嚟時第一時間都會抱佢，之後先抱我，但我每次都喊，我唔係因為唔鍾意爸爸，只係因為覺得陌生，後來爸爸就好少抱我，都唔難理解，不過諗返轉頭其實當時我應該覺得好寂寞。
有一次，爸爸打電話返嚟，佢第一時間就問我係咪家姐，我爭啲忍唔住喊，我擺低咗電話，搵咗家姐定媽咪聽。大個好似有講返呢件事一兩次，啲大人聽到會笑，但我諗心入面其實我一直都好受傷。
家姐細個係好食懶飛嘅人，而我一直都好乖好聽話，又會幫媽咪手穿膠花。每次完咗之後媽咪會畀五毫我，家姐呢個時候會扭計喊晒口，媽咪就會畀幾毫佢（大概係我嘅一半）。我覺得好嬲，佢明明咩都冇做，瞓到黃朝百晏，但點解可以不勞而獲。
覺得自己醜樣呢樣嘢跟咗我好耐。小學嗰時我甚至覺得人哋係因為我成績好，先勉為其難同我玩。最近我睇返一年班張相，發覺自己雖然唔叫靚，但其實都cute，唔知點解對佢咁harsh，我好想返去抱住佢，同佢講對唔住，辛苦佢。
唔知係咪因為以前呢啲事，所以我下意識覺得靚嘅人被厚待係合理嘅事，醜樣嘅人被忽略都係應該，世界就係咁，我要接受。不知不覺中，我就愈嚟愈放大咗外表呢樣嘢。我甚至覺得入面腐爛都唔緊要，最緊要出面好好睇睇。所以無論狀態幾差，我都會執正自己。」
（那個，我沒有一口氣講那麼長喇，只是便於記錄省去支節）
姑娘首先感謝我能如此坦誠分享，每一次她都會提醒這是我很重要的寶藏，叫我要好好珍惜。
「我諗我哋每個人價值觀嘅形成，內裡一定都係盛載咗好多big data，佢嘅出現係好自然嘅事，並唔係你有啲咩問題。外表係一樣好容易睇到嘅嘢，同時係能令人即時享有一啲優勢嘅存在，個社會亦係噉運作。你好努力做得好，好乖咁幫手，呢啲係唔容易，要付出，亦需要時間先睇到。有時有啲價值觀看似唔係太好，我哋會唔鍾意，但其實我哋睇真啲，會發現最後入面其實係源自於一份艱難，係一種傷害，你對外在嘅執着只係因為噉。其實你希望嘅，可能只係被看見，你想要被公平對待。」
呀，姑娘的說話像一股暖流緩緩地流進我的胸口，長久以來的冤屈得到正名，漸漸融解。
對呀，其實我只是想要被公平對待而已。
「我哋一路成長嘅時候會學習到唔同嘅價值觀，有時你會知道原因，有時可能你未必即刻能夠知道。佢會好自然浮現出嚟，但係要唔要放任佢成為脫韁野馬，畀佢拉住走，呢個係你嘅選擇。」
我的雙眼一亮：「我鍾意你呢個比喻，好具體展現咗個情況，亦提醒我，我係有權選擇真正想要揀嘅價錢觀。我想幸福，我想改變……」
姑娘罕有地用較為強硬的語氣對我說：「你已經改變咗喇！你知道嘛，能夠為意自己嘅狀況係一個big step，只要為意到，跟住落嚟就可以分析，可以決定點做，所以我話，你已經改變咗了。」
我喜歡見這位姑娘，她總令我覺得自己有能力可以變得更好（但不是從前那種逞強變好的感覺）。
「我到而家都覺得個世界好殘忍，外型唔好嘅話條路會好難行，但我想由今日開始，將世界同自己分返開。世界可以繼續殘忍，但我可以溫柔。我想自己真係由一個人嘅本質去看待佢，唔再從外表開始，以前我覺得噉樣做嘅人係偽善。對於生得醜嘅人我會有一種抱歉、同情嘅感覺，但其實另一方面我係相信有人真係唔會用外表判斷一個人，只係呢啲人屬於少數，而家我想加入呢個少數陣營。以前我冇辦法噉樣做，因為我都深受其害，我怕過於溫柔會令呢啲人嘅路更難走，但而家我入面有足夠嘅愛，而我亦體會到只有愛先能真正令一個人變得堅強。打擊可以令一個人嘅心變得剛硬，但同時都剝奪咗佢嘅幸福。而我希望自己幸福，希望其他人都幸福。」
請按此登錄後留言。未成為會員? 立即註冊