走在時代前面的Slasher媽媽

Charis Hung-Life 於 04/08/2021 發表 收藏文章

「我覺得現代人有時太貪心,我好自豪自己只係專注於一樣嘢。」 A君如是說。
我想起日本匠人,有些人一生只打造一種刀,一間店一輩只賣一種食物,確實令人佩服。
「你覺唔覺得,人最多應該只可以同時做三樣嘢?再多就會手忙腳亂。」B君則道。
不知道「三」這個數字是如何得出,不過三角向來是平衡能支撐許多事物的數字,或許有著特別魔力也說不定。
但眼前的她,明顯就與上述兩種人的觀點背道而馳。

林麗琼 Kathy 畢業於理工大學的Nursing,是位註冊護士,後來卻去了讀神學,但沒有到任何教會就職,反成了十年的全職媽媽。三個女兒漸長後,她開始出來做Freelance的工作:Kathy為準新人提供婚前輔導,她敎授產前產後的護理,她會培訓陪月員,她是嬰兒瑜珈、嬰兒按摩的導師,她是傭主與外傭的橋樑,她最近還當起了保險從業員,協助客人管理財務風險。2015年正式成立「愛家寧」,喻意為家庭帶來和諧與安寧,提供各項服務與課程。

「百足咁多爪」大概就是來形容這樣的人吧,我一直覺得這是種稱讚,Kathy卻在別人的質疑中,不禁懷疑自己是否太心多,最終「周身刀冇張利」。
「最後有朋友同我講,其實你咪即係而家啲人口中講嘅Slasher。後來我諗一諗,有啲人可能一生只可以專注做一樣嘢或者三樣嘢,但我唔係,我係好怕悶嘅人,而且我並唔係亂咁嚟,我做嘅嘢其實都係圍繞住家庭。我做每一樣嘢都好認真,好專業。諗通之後,我就釋懷了。」
其實我覺得她才不怕悶,也相信她處事認真而有毅力。一個可以當家庭主婦十年,又能當機立斷重新踏入社會並站穩陣腳的人,誰能說她的不是呢?

Kathy第一份Slasher的工作是在社區中心教如何照顧BB,曾是護士又是三孩之母的她,自然得心應手,但她沒有因此自滿,而是不斷進修,學習了嬰兒按摩、嬰兒瑜珈,希望能教授父母給予孩子最好的照顧。

原來過去她餵哺母乳時曾引致乳線發炎:「我好明白嗰種挫敗,會諗係咪自己有問題,後來先知原來係有技巧,唔係個個BB都識點啜奶。有啲護士雖然學過,但佢哋未做過媽媽,未必顧及到實際情況。我希望我嘅分享同教導,可以令啲新手父母走少啲冤旺路。」

婚前輔導或是處理戀愛關係也是她的一大強項。她修讀了調解課程,最近還取得了非暴力溝通的導師資格。她指很多時問題的出現都是彼此不懂溝通的緣故,溝通的意思不只是願意講和聽,而是懂得怎樣講,又曉得怎樣聽,Kathy舉了兩個有趣的例子。

「有一對男女搵我做婚前輔導,佢哋都拍咗拖好幾年,個男仔原來一直都有個遺憾,就係希望女朋友可以幫佢按摩。聽落係好小事,同個女仔講咪得,但原來佢已經同女朋友講過好多次,只係女朋友一直覺得佢講笑,冇擺喺心,往往不了了之。佢哋唔係唔愛或者唔重視大家,我協助佢哋溝通嘅時候,個女仔先第一次明白原來男朋友係認真同咁介意。」
雖然覺得匪夷所思,但也不是不可能發生及不能理解的事。

她補充道:「你有冇聽過愛的語言?即係肯定的言語(Words of Affirmation)、服務的行動(Acts of Service)、真心的禮物(Receiving Gifts)、精心的時刻(Quality Time)同身體的接觸(Physical Touch)。好多女仔都以為男性就梗係最著重Body Touch啦,但其實喺我接觸入面,八成男性都唔係。」

另一個個案同樣是拍拖多年的情侶。
「今次輪到女方有心結,原來佢一直都好在意係自己向個男仔表白先,無論個男仔點安撫佢都冇用。聽落係已經發生嘅事,都冇辦啦係咪?但係喺同佢哋傾談嘅過程中,我了解到其實係個男仔鍾意個女仔先,只係佢想表白時畀一啲嘢阻撓咗,最後變成女方先。於是我幫佢哋整理彼此關係,透過問一啲問題同論述,令到個女仔終於接收到係個男仔動心先,佢先終於釋懷。」
我覺得有趣,忍不住問:「萬一有個個案同上面一樣,但真係個女仔心動先,但佢又好介意,噉點算?」
沒想到她卻反問我:「其實真係,噉又有咩問題?」
我愣了一下,回答:「冇問題呀,我個人覺得先後並唔重要。」
她微笑:「係囉,其實人人唔同,冇得一概而論。每對情侶嘅問題即使大同小異,都一定獨特,只能夠case by case去處理。」

Kathy指很多時情侶或夫妻間的問題都不是由大事引起,反倒是小問題一直積聚,才變成無可挽回,她建議大家有事要盡快處理,自己無法處理的話,便交給專業人士,因為很多時身處其中總是張力滿滿,盲點處處,唯有局外人才能旁觀者清。

愛家寧另一重點服務是處理僱傭關係。機緣巧合下,她曾於菲傭公司擔任過客戶服務工作,所以她深深了解到僱主與外傭產生的誤解與問題。
「香港係好多人有錢請工人,但其實好多人都唔識點揀工人同管工人。呢啲係Agency唔會教你嘅嘢,佢哋巴不得你唔鍾意就炒,請多幾個仲好,噉佢哋就可以賺多啲佣。」

Kathy說香港和工人姐姐國家的文化其實很不同,許多問題有時是緣於彼此不了解而產生的,有時問題的根源可能是僱主,而非工人。當然沒有人願意承認自己的錯誤,大家往往都只願從自己的角度詮釋事情,誤會於是頻生。

「試過有個僱主同我講,個工人之前表現好好,但最近成日撳電話,做嘢又心不在焉,問我佢係咪想駁炒?定冇心再打工?」
是我常聽見的論調呢,難道這是不對的?
「我話你知,通常呢啲猜測九成都錯。以往未有疫情時,香港人換工人好似換貨噉,係而家未通關先好啲。事實上如果個工人一直做得好地地,突然之間變咗嘅話,通常都係因為佢屋企出咗事,可能係老公出軌、屋企人有意外或者仔女病咗。後來個僱主同工人溝通完之後,發現真係因為佢老公有外遇。當然表現唔好係事實,但我相信背後原因唔同,僱主嘅反應同處理手法都會好唔一樣。」

因為自己曾撞過板,所以她很渴望運用所學的知識與累積的經驗幫助和祝福更多人。她沒有在教會中牧會,卻因此把神的愛傳得更廣更深。她笑說有次有個工人就和她說:「Mum,你而家就係做緊宣教(這是她當年讀神學的呼召)嘅工作。」回望,她才發現原來自己早就踏在了神的預備之中。

基督教有句說話叫「榮神益人」,大概就是這樣吧。

如果喜歡我們的文章,請即分享到︰

標籤: Slasher  愛家寧  

留言


請按此登錄後留言。未成為會員? 立即註冊
    快捷鍵:←
    快捷鍵:→