單身者的苦惱 精選

我有位朋友，雖然不知道他有沒有獨身恩賜，不過他確實立志單身，不打算結婚，連戀愛也覺得麻煩。已經認識六年，加上他踏入四字頭，又是個佬，斷估他不是那些高舉「我單身但不寂寞」而其實內裡相當飢渴的人士。我常嘲笑他只是因為還未遇見令他再次陷入瘋狂願意豁出一切的女人，他則是一臉滄桑地說：「唔會喇。」
按理說，只有女人才需要承受愈老愈「貶值」的問題與壓力，男人該不太受困，他卻大嘆道：「係單身就煩㗎喇，有時男人更加。」我擺出一副願聞其詳的樣子。

「即係好似返工噉，每次有啲咩撠手或者出trip嘅job，通常都要我食。大家好自然就會諗，你一支公放工都冇嘢做，我要照顧屋企要返去湊仔陪男/女朋友呀之類。大佬，結婚生仔拍拖你揀㗎嘛，我又冇逼你。我放工有冇嘢做都好，都唔構成我要pick up多啲或者難啲嘅工作，我就係因為想要自由先一個人嘛。」
「噉又係呀，大家人工都一樣，冇理由要你做多啲啫，又唔見佢哋分啲人工畀你。」
「咪係囉，喂大時大節你哋有家庭溫暖，我一個人有時都會寂寞會凍㗎，我都冇complain呀，食得咸魚抵得渴啫。」
在還未與他聊天前，我也理所當然地想一個單身者比起有家室的人時間更彈性，甚至往常工作時自己也會做多一點，可是這確實並不構成必然需要付出多點的理據。
沒有人需要為你的選擇埋單。

「一次半次或者有急事幫吓忙當然可以，但變咗老馮我就有啲唔平衡囉，所以我而家都會推㗎。」
我豎起拇指以示支持。

「仲有呀，男人單身真係好煩，有時遇到啲痴線女人真係有苦自己知。」話說這位朋友人生中遇過幾位「重量級」選手，有些更近乎「幻愛」級程度，在自己的妄想中與他交流。最糟糕的地方是有些人會追著他跑，不止背後stalk他，更出現在他周邊，還騷擾他的朋友。
「最初我咩都唔講，始終人哋女人仔嘛。後來太過份，我先忍唔住出聲，或者叫主辦單位唔好放佢入嚟。有啲人唔清楚，就會覺得你係咪想曬命呀或者乜你咁冇風度㗎，但我真係唔係囉lol。你話如果我係女人，就唔使解釋咁多。」我以憐憫的眼神安慰他。

雖然我們常說世界由父權主導，但在某些方面確實男性才是真正處於弱勢的那方。
「你有冇考慮過買隻婚戒自己戴扮結咗婚，可能可以煩少好多嘢。」我笑說。

社會常常以多數者為主，雖然我覺得這也很正常，畢竟每個人最初也只能從自己出發，大方向自然也在不知不覺中往群眾的方向傾斜，可是當少數人說話時，希望大家也能張開耳朵聆聽，畢竟生而為人，我們本該都是平等的，我知道現實並不這樣，可是理想本應如此，我們就算不能成為烏托邦，也不要相差太遠，令人間成為煉獄吧。

我雖不信佛教，卻很欣賞「業」的說法。
你所做的一切，都會化作業留在這個世界啊。