【影評】本末倒置的《哥斯拉》Godzilla

莎包Mind Too Wild 於 29/05/2014 發表 收藏文章
睇咗依套戲都有一個禮拜有多,但一直公私兩忙,真係有D唔好思!平時的話,過咗氣就唔會再寫觀後感,不過依套戲唔講又有少少谷住度氣。希望大家都睇下、支持下小妹喇~ (跪謝mode)

【故事大綱】
這隻震撼全球的巨獸將會在這場浩大的歷險中,迎接人類改造出來的兇猛生物,威脅到人類的存亡。

【包包觀後感】
連Yahoo Movie嘅故事大網都得咁少字,可想言之內容幾咁單薄。

先整合一下哥斯拉嘅歷史背景,據維基百科資料表示 - 最早嘅哥斯拉係一部受到美國《金剛》影響嘅怪獸電影,描述受到輻射污染海域中而產生嘅一隻身高高達100公尺恐龍型嘅怪獸。哥斯拉後來成為日本類似電影、動畫、漫畫的怪獸原型,對於日本動漫作品的怪獸形象有很深遠的影響。

但今次2014美國版,反而將哥斯拉講成專門吸食輻射為生嘅怪獸,仲幫手對付另外兩隻唔同形態嘅怪獸 - Muto。由從前破壞地球嘅壞蛋角色,一下子變成拯救人類嘅大英雄,完全本末倒置!


片長大約123分鐘,言而怪獸對打部份其實佔好少時間。而且打起上嚟又悶,加上鏡頭捕捉哥斯拉嘅全相又唔多,感覺好似掛羊頭賣狗肉,貨不對辦。

另外,戲中飾演怪獸博士嘅渡邊謙,全場只係得兩個表情。以下就係其中一個表情 =口=" 好想大叫: 阿叔⋯⋯你想點呀?

男主角方面,演技平平。劇情講佢為咗拯救阿爸同人類,不惜冒險去拆核彈。講到好巴閉,點知一路睇一路覺得男主角乜都冇做過,只可以怪個導演點解要咁樣嘥咗依個角色?


惟一要讚嘅係飾演男主角爸爸嘅Bryan Cranston!若果你有睇過美劇《絕命毒師》的話,就會知佢有幾咁正!佢嘅演技係無容置疑!可惜戲份好少~

【總括】
依套戲主要睇特技,但特技效果只屬一般,未能達至怪獸電影應有水平!就算上網睇,都覺得有少少嘥時間,所以我只會畀50分,其中10分係畀Bryan嘅演技!

【同場加映】
包包偶爾喺Facebook 發現依張惡搞圖「恐龍仔班尼Barney」,即時笑咗XDDD

圖片來自:www.facebook.com/sirrex


★ ☆★ ☆★ ☆★ ☆★ ☆★ ☆★ ☆★ ☆★ ☆★ ☆★ ☆★ ☆★ ☆★ ☆★ ☆★ ☆★ ☆★ ☆
你嘅支持,就係我嘅原動力,請畀個LIKE我喇~
個人Facebook Fan Page: https://www.facebook.com/Mind2Wild

歡迎大家跟我聯絡啊~
Email: mind2wild@gmail.com
★ ☆★ ☆★ ☆★ ☆★ ☆★ ☆★ ☆★ ☆★ ☆★ ☆★ ☆★ ☆★ ☆★ ☆★ ☆★ ☆★ ☆★ ☆

留言


請按此登錄後留言。未成為會員? 立即註冊
  • Mind Too Wild 於 31/05/2014 評論 NO. 1

    1954年嘅哥C拉係講佢襲撃左大戸島、東京品川! 所以, 原形係壞蛋角色

快捷鍵:←
快捷鍵:→