【影評】眼高手低的《毒火追擊》Sabotage 〖只值45分〗 精選

仲有一個禮拜《變形金剛4》先上畫，依個禮拜惟有求其搵套戲頂住先。今次我揀咗由阿諾舒華辛力加主演嘅《毒火追擊》，諗住有槍械，一定有勁嘅駁火場面，就算無劇情都有官能刺激，點知兩者都欠奉⋯⋯

【故事大綱】
《毒火追擊》由《警戰實錄》導演大衛艾亞執導，阿諾舒華辛力加、奧莉華威廉絲、美華莉艾諾絲、森禾霍頓主演。電影講述DEA掃毒特攻隊強攻毒販的據點後，私吞了一千萬美元贓款。原以為無人知曉的完美計劃，卻演變成贓款離奇失竊案，隊中成員逐一被神秘人暗殺。在重重謎團之中，每人都有嫌疑，隊員之間開始互相猜忌決裂。

【包包觀後感】
睇完故事大綱，再睇下入面DEA各隊員，個個大隻又兇神惡殺，大家都會覺得依套係懸疑、警匪戰槍片，應該甚有睇頭! 但好可惜，成套戲約109分鐘，有三分之二嘅時間係鋪排兇手有幾咁兇殘恐怖 ，結果係最後三分一嘅時間畀你知，原來係自己人搞鬼，Ending又極度求其，最多只可歸納依套係好悶嘅半動作劇情片！完全被 Trailer 呃哂～

先講男主角阿辛舒華申直瓜，就算Keep住大隻身型都遮唔住年華老去，年紀大好多時動作都笨拙一啲，所以編劇為保住阿諾，都好識得安排角色畀佢，等佢做 Team Leader只係出口，好少出手，最多都係拎重型武器係咁掃射， 咁就巧妙地令老人家減少出洋樣嘅機會！

DEA隊員方面，一開始入侵毒販巢穴嗰段非常勇，其餘時間都係無用武之地，枉佢地有好勁嘅綽號。當佢地個個被政府調查時，個個變成爛仔係度 9 fing，最叻飲酒，完全錯哂～


劇情方面，之前都提過依套戲係比較悶。編劇眼高手低無好好利用故事可伸延嘅複雜性及懸疑性，去處理阿諾有幾想報仇。中段為左埋尾，只交代隊員之一嘅Lizzy，因為 Take野Take得太多，產生思覺失調繼而為左之前所失去嘅一千萬而殺哂啲隊友。用依個理由解釋，實在有啲離譜。

惟一設定得最好嘅角色⋯⋯就只有探員Caroline Brentwood (由Olivia Williams飾演)！對白夠精闢又夠賤 ，如果多啲戲份，可能成套戲又會唔同。


【總括】
整體我只可以畀45分！勸大家唔好嘥錢嘥時間入場睇，倒不如留返精力睇世界盃仲好啦！


★ ☆★ ☆★ ☆★ ☆★ ☆★ ☆★ ☆★ ☆★ ☆★ ☆★ ☆★ ☆★ ☆★ ☆★ ☆★ ☆★ ☆★ ☆
你嘅支持，就係我嘅原動力，請畀個LIKE我喇～

個人Facebook Fan Page: https://www.facebook.com/Mind2Wild

歡迎大家跟我聯絡啊~
Email: mind2wild@gmail.com
★ ☆★ ☆★ ☆★ ☆★ ☆★ ☆★ ☆★ ☆★ ☆★ ☆★ ☆★ ☆★ ☆★ ☆★ ☆★ ☆★ ☆★ ☆