十月南瓜又有咩好怕 精選 推薦

因為萬聖節之故，十月出街食飯總係特別容易見到南瓜！裝飾佈置用又有，作為節日限定特別菜式亦有，但其實南瓜除咗用嚟嚇鬼，營養價值都好高！南瓜有豐富嘅維他命A、維他命C、維他命E、β-胡蘿蔔素、纖維及果膠，雖然以碳水化合物為主，但同時脂肪含量低所以易生飽肚感，特別適合愛美一族食！以下為大家介紹6款本地餐廳供應嘅南瓜菜式，食完抖一陣再去做運動，減定肥好過冬！


南瓜海鮮素翅@蓮花新派健康料理
餐廳資料：http://bit.ly/1LH0Tmz原個南瓜盅裝住扮蝦、扮鮑魚等「海鮮」，南瓜汁夠鮮甜而且多到滿瀉，送飯食一流！加上呢度全部都係素食，感覺上比配肉食又更健康！
(圖片由會員wendyfok提供)

原盅小金瓜海鮮湯@莆田
餐廳資料：http://bit.ly/1M7DRnY
比起上面素海鮮，呢道原盅小金瓜海鮮湯載滿真海鮮包括蜆、白蝦，飲完湯記得刮南瓜肉出嚟食！因為南瓜肉有食用纖維，唔單止可以令你之後更快感覺到飽肚，仲可以促進腸道健康同蠕動！
(圖片由會員手機上傳提供)

抹茶南瓜包@Dreams.The Bread
餐廳資料：http://bit.ly/1LpcMzz
呢間新開唔係太耐嘅中環麵包店，除咗有可愛嘅五色小方包，仲有睇落去幾似一個迷你南瓜仔嘅抹茶南瓜包！雖然有食家試過表示抹茶味唔重，但內裡嘅南瓜蓉餡又多又甜，買返個當早餐，有效預防中風同高血壓！(圖片由會員sugarcat提供)


南瓜炆牛肋骨@韓味屋
餐廳資料：http://bit.ly/1Gjw62r
千萬唔好諗住獨食呢道菜，因為牛肋骨份量頗多，足夠2~3人分享！上菜後侍應會用長剪刀將南瓜一瓣瓣剪開，好睇又好食！另外值得一提嘅係呢間餐廳嘅前菜可以任叫任食，但每人必須點至少一道菜同埋規定食飯時食飯，唔準玩手機！(圖片由會員Hadley Wong提供)


南瓜焗咖哩海鮮@新泰東南亞餐廳
餐廳資料：http://bit.ly/1Grn2YM
如果話上面嘅南瓜菜式尚算健康，咁呢道焗咖哩海鮮就真係好邪惡！雖然食家話唔油膩、咖哩香濃帶有淡淡南瓜味、海鮮大堆頭又新鮮……但食完真係要打吓拳、做吓瑜伽、跳吓舞先掂！(圖片由會員kennethckli提供)


芝士南瓜火鍋@DK Cuppa Tea
餐廳資料：http://bit.ly/1Gjw5eO
同場加映多個萬聖節期間限定下午茶套餐，特別之處在於呢個芝士火鍋係有落埋南瓜蓉！食家可以放道芝士符上去燒，燒完之後可以落紫薯粒、芋頭粒同青口，唔係話十分健康，不過比起一般食大量麵包粒撈芝士算係有特色同有營養！(圖片由會員Cookienonna提供)


更多南瓜菜式此中尋：http://bit.ly/1Lhe1li
下載OpenSnap搜尋更多健康美食——
iPhone：https://itunes.apple.com/hk/app/id806095727?mt=8
Android：https://play.google.com/store/apps/details?id=com.openrice.snap