窩藏邪惡軸心之5大手卷店 精選 推薦

挾住大件夾抵食之名嘅手卷店愈開愈多，單單係下半年都有2間新店分別進駐銅鑼灣同葵芳。由於價格公道兼方便，買嚟邊行邊食抑或係買一打返屋企一邊煲節目/睇波一邊都咁OK，難怪咁多人追捧甚至不惜排隊都要食！以下OpenSnap小編我為大家集結咗5間窩藏邪惡軸心嘅手卷店，大家小心食上癮！

勁回味 / 尖沙咀
餐廳資料：http://bit.ly/1Z7SJPz
呢間可以話係呢類手卷店大紅大紫嘅始祖店！連平日下午3點都有人龍，唔少人都話要排半個鐘先有得食但都心甘情願等，事關呢度手卷質數夠穩定！價錢方面，一件加拿大海膽手卷賣$45，食落夠Creamy冇腥味，三文魚又勁厚切，帶子都大大粒，所以咪好多人都好似中咗店名魔咒咁成日想返嚟回味一番！
圖片由會員提供：ki918

卷之屋 / 葵芳
餐廳資料：http://bit.ly/1Z4VEmX
能夠喺葵涌廣場屹立咁長久嘅時間，仲保留到一班捧場客，卷之屋嘅秘密就係超抵食、勁大件！呢度嘅極大件三文魚手卷可以話最多大激讚，$20內就勁大件可以話坊間少見！覺得三文魚手卷太普通都可以試呢度嘅軟殼蟹手卷同三文魚反卷，後者勁方便一啖一件，行住商場食都唔怕「論盡」！
圖片由會員提供：無料情報 / 愛吃達人 / Food and Crits

手卷屋 / 藍田
餐廳資料：http://bit.ly/1PeMFu7
相比起其他店，呢間位於藍田嘅小舖可以話較寂寂無聞，不過咁唔代表佢嘅質素唔掂，幾位食家都話佢哋嘅刺身料係由頭食到落尾都有！不過需要注意嘅係呢度除咗手卷仲有便當買，如果遇著高峰時間就難免要等耐少少先有得食！
圖片由會員提供：amandawong0113

問卷手卷專門店 / 葵芳
餐廳資料：http://bit.ly/1ZNlJcj
最近剛於葵涌廣場開業，好明顯同卷之屋係競爭對手！可能因為未適應大量人潮，問卷手卷水準唔算十分穩定，不過佢招牌名物「問卷王」一件有齊三文魚、海膽‬、蟹籽同虎蝦都只係$32又係堅正嘅~~~另外佢哋仲有提供多種醬料包括千島醬、蜜糖芥末醬、海苔沙律醬等，鐘意試新嘢嘅可以一戰！
圖片由會員提供： Poortravellers窮遊 / Eleanor39

熊築地 / 銅鑼灣
餐廳資料：http://bit.ly/1JX0Su5
最近小編經過銅鑼灣兩次都見到排哂隊嘅新店，招牌作係三級海膽手卷！一格$40、兩格$75、三格$100，每格有兩件厚身海膽，身為海膽迷真係好難抗拒！另外呢度仲有抵食生蠔同其他特底手卷好似蟹膏蟹肉蟹籽手卷、泰式虎蝦手卷、鵝肝手卷，龍蝦沙律手卷等，但記得記得記得要比足夠耐性同唔好期望過高先好去！
圖片提供：熊築地