係咪要犧牲晒所有嘅嘢，都要証明自己係啱？ 精選

我哋身處一個被譽為全世界最安全嘅城市，咁多年嚟都風平浪静。唔知點解，過咗千禧之後，呢個地方多咗好多考驗; 呢啲考驗不單只將呢個地方推上國際舞台，更加將呢個地方啲人推散。呢種將人與人之間嘅團結推散嘅有個特別嘅叫法 : 撕裂。而呢種撕裂嘅進程已經提昇到2.0。
喺維基百科揾唔到撕裂2.0嘅解說，不過就揾到一個终極撕裂嘅說法，呢個係大撕裂，比撕裂2.0只係摧毁一個地方更勁。呢個大撕裂喺將所有人類認知嘅嘢都绝對摧毀。

說法係講從恆星和星系到原子和次原子粒子，在有限時間的未來會因為宇宙的膨脹進一步的被撕裂。呢個就係宇宙大撕裂。理論上，宇宙的尺度因素在未來有限的時間會變得無限大。宇宙最終將因拉扯而分裂。首先，星系將彼此遠離。重力將減弱至無法將銀河和其他個別的星系聯繫在一起。恆星和行星都將被扯散掉，而在最後的瞬間，原子也會被摧毀。

呢個撕裂係真真正正將宇宙完完全全咁推向直至絕對毁滅為止。呢種撕裂甚至連非物質性嘅嘢好似人與人之間關係相互拉近嘅重力都減弱至無法聯繫。呢樣係大家都最最最唔想見到嘅。

比起宇宙大撕裂，撕裂2.0其實好渣。佢只係用一啲好幼稚嘅手法將呢個地方嘅一啲人激到好嬲好嬲，呢啲好嬲好嬲嘅人見佢講極都唔理佢哋，咁佢哋就扭計囉。佢不但繼續唔啋佢哋，仲好幼稚咁話呢啲好嬲好嬲嘅人係唔乖係曳，仲叫其他人睇下佢哋幾曳吖。最後搞到呢個地方啲人有啲就撑嗰啲比佢激嬲嘅人; 有啲就鬧呢啲人扭計好曳。呢兩班人嘅關係就係咁比佢搞到撕裂咗。呢兩班人都覺得自己嘅睇法係啱嘅，好多時仲會越講越起勁，越講越上火，越講越盡，越講越絕，絕到無彎轉翻晒面兼傷晒感情。完全忘記咗乜嘢係尊重，乜嘢係尊重唔同嘅意見。尊重並唔係要你同意佢，而只係要你明白並知道佢點解會咁講，又比佢講下，唔好當佢無到滅佢聲啫。

討論嘅嘢，各抒己見都唔一定要自己嗰套啱晒嘅。尤其同屋企人，贏唔贏到場交都未知，輸咗頭家就肯定唔抵。係咪要犧牲晒所有嘅嘢，都要証明自己係啱？曾經有人講過 : 其實邊個啱邊個錯又有乜嘢所謂吖，大家喺埋一齊，你中有我，我中有你，開心咪得囉。無謂俾啲搞撕裂嘅搞喎晒自己最最最珍惜嘅關係。啱定唔啱係緊要，但最緊要係互相尊重，尤其係對自己重視嘅關係，你懂的.....