勝負追逐嘅迷思 精選 推薦

勝負追逐嘅迷思
 令人熱血澎湃嘅刹那，喺今屆FIBA男子再次激情暴爆。逆轉反勝芬蘭取得第一勝，再逆轉勝委內瑞拉 - 第二勝。然後……擊敗維德角，取得第三場勝利，攞到巴黎奧運會入場券，赢到國民嘅掌聲同眼淚，交代咗幾個年代籃球從業員嘅堅毅努力犧牲同心血，得到全世界嘅尊重……呢個先至係努力咗20年嘅成果，並唔單止只係對勝負追逐嘅迷思。

 
做好佢，仲要做到最好，唔係你認為嘅最好，亦唔係其他人認為嘅最好，而係事物最最最本質嘅最好。最單一，最純粹嘅最好。
 
係呢個只有1.25億人口嘅地方，唔知係民族精神定乜嘢，佢哋嘅人民不斷喺一啲看似平凡，睇落去平平無奇嘅事物，總係嘗試去發掘一啲令人驚喜嘅額外價值，將事物嘅本質提昇去一個更高層面嘅生命意義同價值。起初，可能大家都覺得佢哋好無聊，揾嘢嚟搞，食飽飯無嘢做揾屎疴，極之岸久。但隨著佢哋嘅嘅堅持，累積到嘅一點一滴，又真係可以打動人心。靠嘅可能就只不過係嗰種堅持要追求做到最好嘅 – 純粹 – 沒有其他，沒有雜質，就只係想做好佢嘅呢一點愛，呢一點純粹。
 
日本足球嘅崛起，好可能由日本漫畫引發; 日本籃球嘅崛起，亦好可能由日本漫畫引發。呢鼓籃球漫畫嘅瘋潮不單直捲本土，直投瘋摩全亞洲，好多年輕人純粹因為呢套漫畫穿起AJ，睇NBA，甚至開始落球場，對住呢個完全陌生嘅實體籃球開始發生親蜜嘅接觸。連呢個國家都回應大家嘅呐喊聲，推行咗一個20年嘅籃球改革政策 - 「JABBA 變革21」。 

就係咁，喺呢廿年裏面，女籃攞咗奥運銀牌; 男籃以今屆FIBA嘅成績，憑實力取得巴黎奧運嘅入場券。查實呢個「JABBA 變革21」有乜咁把炮，可以短短廿年就張國家籃球水平推上國際舞台呢？點解我哋搞呢搞路搞鳳凰，搞極都無乜起色呢？我哋地方細，人口少，人材就自然缺乏啦。人哋塞爾維亞唔夠7mil人口都出咗啲kovic, jokic 世界冠軍出嚟啦。咁JABBA又做咗乜呢？原來佢哋定立咗一個阿媽係女人嘅發展方向。 
強調基層訓練應該以發展球員為主而非取勝為主。球員好，勝利自然就嚟啦。簡單，直接，純粹。其中一個具體例子就係，15歲以下比賽，球員只能用人盯人防守，目的是從小培育選手基礎能力，不因取勝而揠苗助長。長期向呢個方向做，好技術嘅球員自然會多咗。成日聽到我哋做緊教練嘅前亞洲三分神射手喺電視度講，我畫幾十個戰術容乜易呀，要執行到至得㗎。言下之意，球員嘅質素就係籃球運動之基本。其實好易明啫。但偏偏，喺我哋呢個物質豐富，資源充足嘅地方，視野高廣，精英雲集嘅社會，竟然本末倒置。有人大聲疾呼 : 「人哋攞資源去做體育發展，再去攞好成績。我哋就攞咗好成績返嚟，先可以攞資源繼續落去。」下？咁有乜嘢唔妥呀？你証明唔到你得，咁我點說服人批錢俾你呢。如果我批咗錢俾你，你又做唔到嘢，啲人又會話我好批錢俾你，質疑我用乜準則批錢俾你，咁我咪入晒……嗱，呢啲咪行政精英囉，永遠立於不敗之地，比「輸打赢要」更升Lev，直投「輸就唔打，赢咗先要」。仲穩陣過騎樓底戴頭盔多多聲。行政主導，你剩係會聽到啲人用把口講「我明，我明。」根本佢就唔識，咁點會明吖。「我細細個就睇你踢波，個波係用腳踼吖嘛！係咪呢！我都話啦。」死未？ 

對「以發展為主，而非取勝為主」呢個理念嘅感悟，喺好多層面上，好似體育，教育，經濟呀咁，呢個咁文明嘅地方仍然係非常之落後。再等下tim啦，世界盃又到嘞。