吸睛大法 • 贏咗眼球盲咗心 精選 推薦

有人俾咗啲寫文章點樣吸引眼球嘅套路出嚟:

1)揀張靚相
2)寫個靚標題
3)內容多啲圖片，映像，少啲文字啲人會有興趣睇多啲 visual
4)內容要hit到網站嘅目標讀者
5)內容頭段要勁吸引
6)文章唔好太長
7)points要簡單直接

佢哋仲話，通常啲人會喺乜嘢時候睇啲文章，可能係返工放工啲搭車時間，又或者等緊人無無聊聊嗰陣先會睇，太長或者太遲入points都無人會咁有耐性啋你。
聽落覺得都無錯，但硬係又覺得有啲唔妥。喂，又嚟嘞，覺得無錯又覺得唔妥咁茅盾嘅嘢都噏得出。係，好似啱晒但又真係覺得唔妥。有少少似有啲人講: 如果每個環節都做啱晒，咁就肯定無錯。呢句嘢有句嘢跟尾，就係: 鬼唔知阿媽係女人咩。問题係乜嘢相，乜嘢標題為之靚？點樣至寫到好吸引嘅開頭？內文幾長先至算唔係太長？點樣寫啲points至算係直接？目標讀者係乜水，鍾意睇乜？幾多visual為之夠？照咁睇，咁樣其實好似係將個問題轉咗用答案形式再問多次咁咋喎。

好吖，當你做到齊又跟到足，係咪一定多人睇先; 當你做得到又真係多人睇咗，咁係咪多人睇就係你寫嘢嘅唯一目的呢？又未必係喎。跟足晒套路，寫嘢死實實咁，睇落似寫宣傳稿多過似寫嘢。但係咪多人睇就代表佢哋欣賞你呢？咁生果報啲料夠啱晒套路又好睇又多人睇啦，但你好少會欣賞寫嘢嗰個人喎。
係，寫啲嘢出嚟梗係想多啲人睇嫁啦，唔係就唔使揾平台啦。好多寫嘢嘅人其實都希望有人欣賞自己。呢個欣賞未必一定係讚賞，可能只要你肯用心睇下佢寫嘅嘢，諗下佢究竟想講啲乜嘢就已經俾咗佢最大嘅尊重。咁梗係多啲人欣賞又揾到食就最good啦。

吸睛大法呢個套路可能可以幫你吸引眼球，亦有可能殺死咗你隻天馬，搞到你為咗吸睛變咗日日喺度啤罐頭文，咁就忘本盲心。提防！提防！提防一個唔小心變咗做啤膠員。