想寫啲多人睇嘅嘢,定係想寫啲嘢多人睇

有乜講乜 於 13/04/2020 發表 收藏文章
想寫啲多人睇嘅嘢,定係想寫啲嘢多人睇


曾經有人講過寫嘢要做到「無壓寫作」就要認清套路,切忌「認真便輸了」。唔好俾啲懶係嚴緊嘅格式、文法、結構、舖排、手法呀呢樣嗰樣搞到你得個左諗右諗,諗吓寫乜好呢?諗吓,度吓,設計吓,寫乜題材好呢……咁就中咗招……「認真便輸了」,落筆有如千斤重,縐晒眉,搲晒頭,年初四咁嘅面口,咁又點可以開開心心寫啲嘢吖。求求其隨心寫,寫下呢樣,寫下嗰樣,有乜寫乜,啱又好,唔啱又好,寫咗先算,咁離開「無壓寫作」就近咗一大步㗎嘞。


寫得啲嘢出嚟梗係想多啲人睇㗎啦,唔係就唔使揾平台啦,收埋自修就得啦。好多寫嘢嘅人其實都希望有人欣賞自己。呢個欣賞未必一定係讚賞,可能只要你肯用心睇下佢寫嘅嘢,諗下佢究竟想講啲乜嘢就已經俾咗佢最大嘅尊重。所以啱睇就俾個Like,俾個回應,俾啲意見,轉載下,唔啱睇嘅插下都得,咁已經係好好㗎嘞。最令人失望嘅,好多時並唔係腐皮; 而係寫咗啲嘢出嚟,掟咗佢出去,然後静晒……………………………………唔知佢去咗邊,直投好似上咗外太空咁…… 你唯一可以做嘅就係等。有人話,人世間最痛苦嘅莫過予等待……的而且確,等待回應真係好煎熬痛苦嘅一件事,呢句說話喺呢兩年令人有更深更大代價嘅體會。你知道嘛,無回應可以好可怕,好有摧毀力。你睇下,就係有啲人唔回應一啲人嘅訴求,令到其中一個全世界最安全嘅地方變成戰場。


就係咁等下等下,又開始胡思亂想,係咪寫啲嘢唔得呢?文筆唔得?題材唔啱?要點樣先至多啲人睇呢?又咁又咁。咁又有人講嘞,想多啲人睇都有套路㗎。俾招「吸睛大法」你嘆下先。

1)揀張靚相
2)寫個靚標題
3)內容多啲圖片,映像,少啲文字啲人會有興趣睇多啲visual
4)內容要hit到網站嘅目標讀者
5)內容頭段要勁吸引
6)文章唔好太長
7)points要簡單直接

高招一出,彷然大悟。快,狠,準! 目標顧客喺晒度。Sell嘢本來就係咁,簡單直接。啲客想睇嘅嘢,你寫啱佢咪啱囉。Dup下一編,Dup下又一編,跌咗rating,咁咪出拳重啲囉; 個heading寫激啲,啲相放盡啲,驚睇唔明呀?再白啲,白到無色,無內容,無空間,無故事,變咗做啤膠文,得返個模,剩返個殼。穩陣係夠晒穩陣,不過好似有啲唔妥。睇返轉頭,問返自己,究竟係想寫啲多人睇嘅嘢,定係想寫啲嘢多人睇。即係好似啲人問啲初入行嘅歌星藝人咁: 「你入行係想做明星定想做歌手演員呀?」嗱,答乜唔緊要,無分高低,自己唔知見步行步都唔緊要,最緊要唔好忘本盲心亂咗龍,睇錯風景,令自己難受。

正所謂食得咸魚抵得渴,自己揀得咸魚梗係覺得咸魚正啦。況且,可以每一日都堅持用咸魚送飯有時都可以好幸福,亦唔係每個人都咁幸運可以擁有呢份堅持嘅自由,體驗到呢種幸福。靚嘅咸魚都有佢嘅價值,仍然可以堅持鍾意咸魚就已經係令人好幸福。咁你仲想點?

如果喜歡我們的文章,請即分享到︰

留言

會員
我要評論
請按此登錄後留言。未成為會員? 立即註冊
  • Lam Kin Ping
    Lam Kin Ping 於 16/04/2020 評論 NO. 1

    魚與熊掌嗎,配圖的意思是?
    寫得好但冇人欣賞,好過寫得衰但好多人睇。

  • PMYIFP
    PMYIFP 於 17/04/2020 評論 NO. 2

    做咸魚都要做條最咸的
    揀咗就去,how far u can go for being a 咸魚

  • PMYIFP
    PMYIFP 於 17/04/2020 評論 NO. 3

    這樣嘅字體最终成為集體回憶,地方文化

  • 紫蜜語
    紫蜜語 於 17/04/2020 評論 NO. 4

    寫得啲嘢出嚟梗係想多啲人睇㗎啦,唔係就唔使揾平台啦,收埋自修就得啦。
    好好笑xdxdxdxdxdxd

  • PMYIFP
    PMYIFP 於 19/04/2020 評論 NO. 5

    有人話魚與熊掌,其實兩樣都想。
    好多人都講過,先追求生存,再追求生话,然後追憶經歷,享受有得選擇嘅自由。

快捷鍵:←
快捷鍵:→