想點就點,呢啲就叫做Power嘞

有乜講乜 於 06/08/2019 發表 收藏文章

想點就點,呢啲就叫做Power嘞

曾經有人講過: 喺工作上比較成功嘅通常喺兩種人; 一種係真係好叻好頂尖嘅人, 另一種係有好多朋友幫嘅人。如果你哋喺職場打滾咗有咁上下日子,都會對呢番說話有一定嘅領滙。甚至宜家有人認為對第二種人嘅講法更加啱聽,然後再發展另一句明言: 識人好過識字。聽落都好似幾啱。

其實我哋大部份都係平凡人,又唔係特別叻,絕對唔算係頂尖嘅人物; 如果性格上又唔係咁識得廣交結友,又無乜朋友幫手,咁又可以點樣呢?係唔係就一定一事無成呢?綜合觀察身邊人與事,事業成就得失除咗睇天睇命睇運氣,仲要睇自己。睇自己係邊類人,如果無乜特殊命格,過運又無迫你發圍又無迫你乞食,咁大約都估到會有乜嘢結果。所以,借鑑前人結果,或者揾到啱自己期望嘅事業成就,咁都算很有得揀吖。

好多時年青人初出茅籚,不知天高地厚,對前景過份期望,成日覺得自己遲早會係上市公司主席,但又無照下自己個樣,唔理自己掂唔掂,剩係覺得自己啲老細好唔掂,剩係覺得自己懷才不遇就週圍揾伯樂,一年唔夠就轉工,轉完又轉,轉完再轉,一路轉一路轉係咁轉……想揾份工個老細會就晒佢,甚至當佢神咁拜,無咗佢唔得咁,最後轉嚟轉去得個吉。呢類人成日無份工做得長,份CV博覽羣工,多學少成,永遠都係得面嗰沾。講,佢哋真係答得頭頭是道,但係一叫佢哋落手落脚做就即刻收工。佢哋喺事業期最初會好風光,經常轉工,撞啱個巿就,人工就跟住係咁升,真係體現咗「魚唔過溏唔會肥」呢個職場座右銘。不過,去到中後期,佢唔再係靚仔,張C V就會嚇襯好多人,啲人見到嘅唔係博覽羣工,而係無份工做得長,無份工留到佢,間間公司都夾佢唔到。

另一種人會有相似嘅CV,又係轉工多過食飯,呢類人永遠活喺佢自己嘅comfort zone,有好強危機意識,知道晒公司嘅一舉一動,往往佢哋都認為自己係最挑通眼眉嗰個,最睇通睇透公司嘅危機,成日話公司點樣點樣唔掂,又報晒料俾公司大大小小嘅同事等佢哋唔好俾公司蒙敝咁咁又咁咁…… 講嚟講去都係幫自己鋪路; 鋪定條日後離職路。講到呢類人剩係識得彈,永遠唔識得做,安逸嘅時候就講是非,遇到困難就走先,遇事即逃。成世都唔使經歷考驗,hea下hea下,閃下閃下就過咗大半世。啲老细見到佢份CV,見佢做過咁多嘢,不過就唔肯定佢識做啲乜嘢。

唔好俾自己變成上便講嗰種人,咁仲有乜揀呀?唔使慌,你可以考慮成為另一種人,呢種人都可以走上公司企業嘅高層,事業嘅頂峯。做呢種人可以講話易唔易話難唔難,呢種人會牽涉一種辦公室政治鬥爭,鬥嘅係乜,就係鬥長命。呢招好駛得,最重要嘅係有耐性,唔怕悶,識得明哲保身,清楚自己嘅定位,儲年資,了解公司內部運作,同公司其他部門長時間建立交情,漸漸變成老臣子,老海鮮,確立固若金湯嘅地位。不過,你求神拜佛都希望間公司長命百歲,如果唔係,都唔知出面有無其他工啱你。

有人話: 辭職係想話俾自己聽,我仲有得揀。呢句「仲有得揀」其實就係人類最響往最想追求嘅自由。你有得揀,揀做邊種人,想點,自己將來事業就會係點。你想點就點,呢啲咪叫做Power囉。

如果喜歡我們的文章,請即分享到︰

標籤: 想㸃就㸃  Power  CV  鬥長命  有得揀  

留言

會員
我要評論
請按此登錄後留言。未成為會員? 立即註冊
快捷鍵:←
快捷鍵:→