我有個朋友好耐無見

有乜講乜 於 08/02/2021 發表 收藏文章
我有個朋友好耐無見
 
有個朋友好耐無見,耐到都唔記得上次係幾時見過,唯有靠啲蛛絲馬跡再加啲假設先可以計算到可能已經喺14年無見。14年係一個乜嘢嘅概念。鼠牛虎兔龍蛇馬羊猴雞狗豬,十二個生肖行個圈都只不過係12年。由小學讀到中學畢業,考埋DSE都只係12年,你仲有兩年剩低可以用嚟留班。隔咗咁耐無見,今次見返已經無得傾偈嘞……

 
見返面諗返起,成世人第一次喺街度同人打交,就係呢個好耐無見嘅朋友同另一個都好耐無見嘅朋友一齊嘅。嗰次係我哋三個人夜晚喺個公園度讀書,無錯,係讀書,仲係會考嗰隻,同隔離枱又係三個男仔有啲誤會就打起上嚟,打完交算係赢咗咁就兩班人各有各散。單嘢仲未完,第二晚又去返嗰個公園温書。今次大鑊嘞,一去到公園,好似拍戲咁,成班古惑仔衝出嚟,有啲仲係喺山上便個斜坡sir落嚟,最少四,五十人圍住我哋,當時都唔係好識驚,後來佢哋嘅大佬出嚟講乜乜乜乜……物物物物……然後最後話兩班友都係嚟呢度讀書嘅,唔好搞咁多嘢,誤會嘅嘢就算啦,叫我哋同佢哋耍個冧就算數……咁就梗係即刻耍晒冧走人啦。後來諗返起,都真係好好彩……嗰時啲社團人仕都好有道義,如果換咗係今日,我諗唔俾啲小朋友溶咗,都俾佢哋打到殘廢……呢個好耐無見嘅朋友,係一齊經歷過生死嘅朋友。
 
呢個好耐無見嘅朋友,我由中一就認識佢,佢樣樣嘢都中中地,讀書中中地,成日爭少少先入到前列,但永遠唔會危危乎; 運動又中中地,睇佢身型肥肥地,吖,估佢唔到陸運會佢又走去跑100,200米短跑喎,又係成日爭少少先入到Final,但又跑得都幾快㗎喎,亦永遠唔會包尾; 踢波又係中中地,喺隊波入面又唔算起眼,前鋒,中場就無佢份,但又踢得幾穩喎,你唔好理,佢咁樣都入選到小童群益會啲暑期足球訓練隊㗎喎。我知佢其實對自己好有信心,好有要求,好有期望。只係佢不嬲都好低調,唔鍾意搶風頭啫。
 

呢個好耐無見嘅朋友,你以為佢睇落唔多起眼,其實因為佢係一個too nice guy,好容易同人做朋友,容易到根本你唔會覺得佢唔係你朋友,好自然咁就做咗朋友,自然到你都唔記得你哋點解會成為朋友……我就唔記嘞,你哋呢?
 
中學時期有一段時間,唔知點解,覺得無乜人同我食lunch,好有俾人遺棄嘅孤單感覺。就係呢個好耐無見嘅朋友,我日日跟佢返佢屋企食lunch,佢從來無say no,連佢媽媽都係一個好好嘅人,對我好好,又成日加餸。我記得,我有話過將來會請伯母飲茶,不過,我未兑現呢個承諾,亦無機會再去兑現呢個承諾。我知道,伯母唔會怪我,因為我知道伯母佢知道我想請佢飲茶嘅呢份心意從來都無變過。
 

呢個好耐無見嘅朋友佢好少講嘢,好少表達自己,好少透露自己嘅感覺,好少提及自己感情……但係佢就揾過我陪佢追女仔,而我扮演嘅角色就係凳腳,係打麻雀嗰啲凳腳。打麻雀要4隻腳,除咗女主角,呢個好耐無見嘅朋友,連埋我,仲有一個更耐無見嘅朋友,最得意嘅係呢個更耐無見嘅朋友原來都係鍾意女主角……佢兩個有相同嘅愛好嘅呢樣嘢,喺多年之後再次引證,中學畢業之後,佢兩個同樣地走咗去當差,又同樣地當咗幾年差之後就轉行。之後,我呢個朋友成日都希望做生意,雖然佢無講過,我知佢好希望可以出人頭地。其實,又有邊個唔想吖。

 
呢個好耐無見嘅朋友,佢收得好埋,佢拍拖10幾2O年我哋唔知,佢結咗婚我哋更加唔知。乜嘢都收收埋埋,連嬲咗你都唔會俾你知。我從來無見過佢發火,從來無見過佢鬧人,從來無見過佢同人有正面衝突。佢永遠都係最nice嘅nice guy。
 

朋友耐唔見,來來去去都無非係你唔揾我,我唔揾你,你又忙,我又忙,你唔采我,我唔采你,你又嬲咗我,我又嬲咗你,我揾你又唔得閒,你揾我又唔得閒,得閒出嚟吖,遲啲出嚟聚下,諸如此類無無謂謂嘅理由。講嚟講去咪又係當老馮,以為總有機會,唔見咪唔見囉。久而久之,想見都見唔到,剩低嘅就只有以前,露營,踢波,打交,追女仔,就連香港最後一班柴油火車都一齊坐過……之後呢?
 

世事無常,話走就走,從前之後種種點滴,見面再講……
 
你兩個揾定位啦。

如果喜歡我們的文章,請即分享到︰

標籤: 常盛街公園  火車  追女仔  紅磡邨  打交  

留言


請按此登錄後留言。未成為會員? 立即註冊
  • Lam Kin Ping 於 10/02/2021 評論 NO. 1

    我都有呢個朋友,共鳴滿滿。

  • PMYIFP 於 10/02/2021 評論 NO. 2

    要珍惜
    也要為夢想努力,師兄加油

快捷鍵:←
快捷鍵:→