時間㸃計? 千八萬都買唔到One Day?

有乜講乜 於 05/05/2019 發表 收藏文章

而家啲人無晒耐性,乜都要快; 連病咗都要特效藥想立即好返。連自己身體感受都無時間理,又唔俾佢休息下,剩係一味將佢催谷,希望將佢推上極限再上一個極限,直至冧偈為止。

冧偈可分二為類基本原形。一種係外向形; 好易明好明顯亦都容易被人理解,即係身體跪低咗; 由腰背坐骨膝頭頸椎關節手腳勞損到心肝脾肺腎膀胱泌尿眼耳口鼻皮膚腸胃腦袋血管等內臟衰竭。所謂容易被人理解就係只要你茶餘飯後閒話一句「最近膝頭有啲痛,踎都踎唔到……」都未講完,中醫西醫針灸跌打體適能健身物理治療關節骨科脊醫專家意見即時風冚咁湧埋嚟,聽都聽唔切,可想而知啲人有幾咁理解接受啦。

另一種係內向形; 唔易明唔明顯亦都唔容易被人理解,呢啲係心理頂唔順; 壓力爆煲思覺失調躁狂憂鬱躁鬱抑鬱認知障礙老人痴呆記憶衰退精神分裂等等。好少人提亦好少人公開談論,好似好避忌咁。講得少自然知得更少,咁又點會容易被人理解吖?

其實如果唔想咁易冧偈,將生活節奏放慢啲得唔得呢?啲人乜都咁趕為乜啫?做嘢又趕,旅行又趕,玩又趕,做運動又趕,學嘢又趕。又鍾意將自己個schedule排到密一密; activity 同activity之間連去厠所嘅時間都無。有啲人仲會將呢套密不透風嘅编制手法放喺小朋友身上,咁係咪真係好呢?既然係密不透風,即係唞唔到氣啦,會窒息死人㗎,代價似乎太大喎,嗬?

話就話時間就係金錢,但係咪只有金錢至可以用嚟衡量時間呢?呢個運算又可唔可以逆向等價交換呢?咁究竟係金錢比時間重要啲,定係時間比金錢重要啲呢?呢個問題連國際武術巨星,捷拳道嘅宗師都抓晒頭。唐代王貞白《白鹿洞二首》同埋明代羅懋登《三寶太監西洋記通俗演義》俾咗一句好有啓發性嘅名句: 「一寸光陰一寸金,寸金難買寸光陰。」基於金錢係唔可以buy back時間,時間應該睇高一線。不過國際巨星就曾經問過: 「我買啲光陰嚟做乜嘢呀?」但係本港股神就曾經表示願意用九成身家換三十年青春; 你知唔知九成身家係乜嘢概念,係多過2000億元嘅概念,三十年計就即係每日一千八百二十五萬; 無錯,係$18,252,338.60一日,不過即使係咁巨大嘅代價都無可能buy back一日。可見錢並非無所不能,反而時間面前人人平等,人人每日都係得24小時,無多無少,無論你想唔想擁有佢,同時,你亦都無能力留住佢或者送走佢,你只可以同佢共存。你信唔信都好,時間可能係人類整出嚟用嚟整蠱自己管自己嘅嘢,唔好信晒佢,靠晒佢,更加唔好俾佢迫到你冧偈,要俾返多啲耐性自己嘞。

如果喜歡我們的文章,請即分享到︰

留言

會員
我要評論
請按此登錄後留言。未成為會員? 立即註冊
  • Sidestep
    Sidestep 於 07/05/2019 評論 NO. 1

    似乎問緊時間的價值。
    好難抽空衡量時間的價值。
    我地只能用成就、金錢、身體健康等等去衡量。
    時間怎樣被運用,得到什麼,
    是多少%的成就,多少%的金錢,多少%的身體還健康,
    似乎就是時間的價值。

    當然,
    我覺得不一定只用成就、金錢、和身體健康去衡量的。
    得到的樂趣、對身邊其他人的影響、實踐信念 / 信仰等等,
    還有很多東西可以說明時間的價值的。

  • PMYIFP
    PMYIFP 於 07/05/2019 評論 NO. 2

    我覺得時間只係共同標準單位,本身係無意義嘅。佢又用唔到,保留唔到。有趣嘅其實係生活,經驗。要慢慢享受,唔好急。

  • Sidestep
    Sidestep 於 07/05/2019 評論 NO. 3

    你比較重視生活經驗的價值,
    一種質性的價值,無從比較,
    顯得獨特而寶貴。
    慢慢享受生活。

  • PMYIFP
    PMYIFP 於 07/05/2019 評論 NO. 4

    通常未能達到的理想,都會用其他方式呈現。寫嘢是其中之一。

  • Sidestep
    Sidestep 於 07/05/2019 評論 NO. 5

    都是一件好事來的,
    享受寫作的一段時間。
    或許事情會慢慢變好呢。

  • PMYIFP
    PMYIFP 於 07/05/2019 評論 NO. 6

    謝謝,請繼續俾多啲意見

快捷鍵:←
快捷鍵:→