望住電視等待嘅自由

有乜講乜 於 15/06/2019 發表 收藏文章
又一個望著電視唔知等乜嘅晚上。

電視播嚟播去都係嗰幾段重覆片段,睇完又睇,睇完又再睇,一路望著個電視,一路期望會有新資訊。等呀等,間中會有啲update。等呀等,都唔知自己等乜。等呀等,咁就零晨四點幾嘞。究竟要等幾耐?究竟仲有幾耐要等?喺呢一個時代,你同我都唔知道。

係好耐好耐以前,喺電視睇到啲台灣人會開開下議會就嘈喧巴閉,仲好多時越炒越大鑊就走出位跑去個主席度打架,真係O晒咀。當時睇到都覺得啲台灣人好失禮,好粗鄙,好無教養。假假地都係議員吖,使唔使咁丢架呀,做晒馬騮戲咁,不知所謂。就係咁,原來呢啲笑料都係由一個新政黨搞出嚟嘅。佢哋好憤怒咁解釋,既然點樣講點抗議點绝食點和平佢哋都唔會聽唔會理,除咗出手抗爭咁你仲有乜方法令當權黨聽到佢哋嘅聲音呢。喂,有啲地方有人自焚咪一樣無人聽無人理,反而俾人再三迫害啦,又如何。點知俾佢哋咁樣搞下搞下呢個新黨啲嘢終於又真係有台灣人聽到,十九幾年後啲台灣人仲選埋佢哋啲人做總統tim,死未。

又係好耐好耐以前,又係望住個電視播嚟播去都係嗰幾段重覆片段,睇完又睇,睇完又再睇,一路望著個電視,一路等呀等。今次喺電視睇到嘅係北京有好多好多人,佢哋喺嗰個地方逗留咗好多日,越留得耐就耐多人湧去嗰個廣場。越多人就越有一種眾志成城嘅熱血。呢種興奮連遠在1968公里外嘅好多好多香港人都受到感染,仲好似話有成150萬人喺香港上晒街支持tim。嘩,唔好搞咁多嘢啦,有書讀就讀好佢啦,搞搞震仲越搞越大壇,咁做真係有用咩?唔知,就算有都唔知要等幾耐。一路追住個電視好多好多日,直至有一兩日好似無咗直播睇,氣氛由熱血變成不安,跟住再睇到嘅除咗人仲有坦克。搞下搞下呢件事令到香港人學識咗示威遊行同埋移民。除咗移民美加澳外,連星加坡领事館都有人排晒長龍攞form,死未。

無幾耐之前,又係望住個電視播嚟播去都係嗰幾個地方,今次啲人唔玩遊行示威嘞,直投玩瞓街唔返屋企。開頭佢哋去中環瞓,中環唔夠皮就走去金鐘灣仔銅鑼灣,後嚟仲過埋海去埋油尖旺。啲人去下去下當咗中環係屋企,大人細路男男女女老中青學生遊客乜人都有,加加埋埋有成120萬人参加。驚啲學生荒廢學業咩,連補習班都喺嗰度搞埋。住下住下不知不覺就住咗二個幾月。叫你哋走,你哋又住慣咗唔肯搬返屋企; 趕你哋走,你哋又奀皮到死賴死唔走; 唯有出啲力趕啦,仲俾你哋頂返轉頭。咁搞法唔掂喎,砰一聲!出催淚彈嘞!推推撞撞打打鬧鬧搞咗好多日,就係咁,你哋呢啲赤手空拳嘅路宿者又點夠嗰啲設備精良嘅公僕鬥吖。喂,埋牙郁手呀!你估同你講道理呀,聽就唔使上街啦,你得把遮咋,擋風擋雨擋胡椒就得,硬嚟真㗎,你點同佢哋鬥吖。都唔知放咗幾多粒催淚彈,噴咗幾多公升胡椒噴霧,我喺電視睇隔住個芒咁遠都睇到眼濕濕,都唔知係啲催淚彈勁,定係心痛緊啲公僕每放一粒彈我哋就唔見咗好多錢。好彩無好似好多年前北京咁出坦克,如果唔係仲輸得多。過咗呢幾十日好似戰地實況咁之後,香港人嘅色彩就無以前咁豐富,安全和諧嘅綠色少咗好多好多,因為黄色同藍色從此之後就再溝唔埋嘞。不過,雨傘嘅用途就多咗。

今次,喺電視機前面望住個畫面,見住啲速龍週圍追住啲細路係咁咬,又槍又胡椒又子彈又布袋彈,重覆又重覆。究竟,仲會有幾多個望住個電視等待嘅晚上呢?

曾經有人話過: 最痛苦嘅莫過於等待。呢種痛苦要幾耐先至消失呢?又或者终有一日你會習慣咗呢種痛苦。又或者终有一日連想等待嘅自由都會無埋。到嗰個時候,你會慶幸你曾經擁有望住個電視機等待嘅自由。

如果喜歡我們的文章,請即分享到︰

標籤: 等待  自由  抗爭  遊行示威  子彈  催涙彈  坦克  台灣  

留言

會員
我要評論
請按此登錄後留言。未成為會員? 立即註冊
快捷鍵:←
快捷鍵:→