理智最笨

有乜講乜 於 16/04/2019 發表 收藏文章
有啲人認為男人比女人有較高嘅理性。又有啲人認男人比女人更加理智。咁理性啲同理智啲係咪就醒啲吖?理智,理性,理性,理智究竟係乜???維基百科係咁講:
理智(英语:reason),一種人類的心智能力。 它被認為是一種思考、計算、衡量、推理與邏輯的能力,通常被當成形容詞來使用。 當我們說一個人是理智的,代表他的行為都是經過思考,考慮過對錯、前因後果,有道理,合乎邏輯的。 具備這樣能力的人,我們會說他是理性的。
理性(英語:Rationality)是指人類能夠運用理智的能力。相對於感性的概念,它通常指人類在審慎思考後,以推理方式,推導出合理的結論。這種思考方式稱為理性。理性屬於意識的範疇,且為意識的性質。 理性,基於意識,是具有參照性的意識。 參照系,可以是生命,比如本能;也可以是知識,比如坐標;也可以是意識,比如自我。

咁即係用理智去思考就係理性; 理智思考就係一種運用計算、衡量、邏輯、推理方式推導出合理結論嘅思考方法。即係計過度過,有根有據做晒分析咁推斷結果或者作出结論,再進一步係可以決定下一步點做。嘩,好似好勁喎,咁樣咪好多問題都可以咁樣處理搞掂囉。係,但係又有好多問題唔係咁樣就可以搞得掂。

理性係好叻將啲嘢煎皮拆骨,慢慢分析資料呀,數據呀咁,完全睇數字對事不對人。純公事,零感情,好有效能,好高效率。但係係咪所有嘢都可以用理性嚟處理就做到最好嘅結果呢?咁又未必。好似燃油咁,一射入引擎到即刻有反應仲嘭嘭聲tim。但如果攞嚟對付火紅火綠嘅男女、男男、女女,成桶高效燃油潑埋去,你話會點。有啲狀況行理性係最笨嘅,睇睇。

狀況: 你咁唔理性,我哋無嘢可以傾。
呢啲都係日常經常出現嘅情況,通常都係男女,男男,女女,父母仔女嘅對口場景。嗡呢句嘢通常都係理性嗰個,要求對方理智啲去對代佢同埋討論緊嘅問題。另一個就係可能暫時失去理智嘅人,但佢唔覺得自己係唔理智囉。你越係要求對方理性,對方越係覺得你話緊佢唔講道理,即係撥緊火。所以呢啲時候講理性係最笨,除非你諗住用多十倍時間同精力擺平件事。呢個時候有兩招可用。

第一招: 非常時期用非常手段。
電視都有講啦: 赢咗場交,輸咗頭家。喂老友,交就可以成日嗌,家就唔係成日可以成。值搏率太低,即係代價太大,赢咗都無著數,嗌唔過。任何時候,其中一方失去冷靜就係非常時期,因為正常人都被假定為係理性嘅。呢個時候講理智衰咗九成,應該sell諒解,當佢依家講乜都啱,真心體諒佢嘅情绪,唔做任何火上加油嘅危險動作,以柔制剛,軟化佢,等佢從狂風暴雨回復風平浪靜。太陽同北風嘅故事,溶化佢,你聽過未?

第二招: 唔咦係喎吓。當對手進入忘我境界,佢淨係想將佢心入便嘅嘢爆晒出嚟。呢個moment就有好多醒目仔懶係理智咁想入位展示自己理解他人的獨門绝技,不停插插插,比意見,又扮晒挑通眼眉,又扮晒持平,嗱,我唔係話幫邊個,我確得咁咁咁就公道嘞。雖然,通常佢哋俾出嚟嘅嘢都係合理嘅,但係依家唔係問你意見呀醒目仔,人哋喺度爆緊,使鬼你俾意見咩?你越理智佢,佢越顛。佢最需要係一對耳仔同埋情感誠懇嘅唔,咦,係喎,吓呢類型嘅支持。
你話係咪呀vs 唔
你估佢係咪都好似我咁諗呢vs 咦
你話佢哋係唔係唔make sense 吖vs 係喎
佢咁樣睇我呀vs 吓

所以話,理智唔係大晒; 出錯場,分分鐘揾自己笨。不過,識得用上面嗰兩招嘅人,其實都要好理性。咁即係點?慢慢諗下啦。

如果喜歡我們的文章,請即分享到︰

留言

會員
我要評論
請按此登錄後留言。未成為會員? 立即註冊
快捷鍵:←
快捷鍵:→