萬般帶不走。唯有業隨身

有乜講乜 於 22/07/2020 發表 收藏文章
萬般帶不走,唯有業隨身

呢句說話由一個大隻佬發揚光大,原文應該係「萬般將不去,唯有業隨身」

根據各網上說法,呢句說話嘅出處並唔係正式的佛經,只是一個名叫王日休的古人在其《龍舒增廣淨土文》提及過。文藏於大正藏第47冊No. 1970龍舒增廣淨土文,係一本倡導勸佛嘅著作。

原文節錄「一日無常到,方知夢里人; 萬般將不去,唯有業隨身。」後人用後兩句而成一偈云云。

作者王虛中,名日休,廬州人也。宋高宗時,舉國學進士,棄官不就。著書名龍舒淨土文。自王公士大夫,下至屠丐僮奴,皂隸優妓之屬,咸以淨土法門勸吊皈依。其文淺說曲論,至詳至懇,若父兄之教子弟然。虛中嘗無量壽經,稱讚西方,義蘊深廣。發揮儒佛之心宗,教授具信之子弟……

呢句說話無論係原文「將不去」又或者「帶不走」,到最後都係「業隨身」字面睇落顯淺易明,但係就令人有好多反思嘅空間,細心啄磨隱含其中嘅道理。

萬般泛指所有物質以至非物質嘅東西同埋意念; 呢個叫萬般嘅嘢包含咗你身在現世差不多你諗得到,又或者連你都諗唔到嘅嘢。比如,錢啦,親朋戚友啦,屋啦,權力啦,猫猫狗狗啦,愛情啦,喜好啦,花草樹木啦,慾望啦………………喺你要離開呢個世界嘅時候,講直啲即係瓜老襯嗰陣,一概都要擺低,無得跟身…………除咗一樣嘢,你既唔可以擺低,又唔可以thing甩,呢樣嘢就係「業」。「業」係乜?「業」可能係你做過嘅嘢,諗過嘅嘢,講過嘅嘢,總之因為你而影響到因果規律,呢個就算係「業」㗎嘞。呢樣嘢,好易明。我去打波,同人發生碰撞,嘈咗兩句,以為無事,點知過咗幾日我再去球場,俾人圍,仲俾人打咗一餐tim。現眼報,今生做,今生報。而「業」就係你做過嘅嘢,你搣唔甩,thing唔低,就算你離開呢個地方,離開呢個人,離開呢段關係都無法子搣甩佢。做咗就係做咗,最多都係「當」無做過,並唔係真係無做過。佢會帶出一個後果,或者應該係一個影響,無論呢個後果或者影響有幾大有幾细,就算你離開咗呢個世界,呢個時代,呢個時點,呢樣嘢都唔會結束,一直持續落去……

打個比喻,「萬般」同「業」嘅關係就好似「物質文化遺產」同「非物質文化遺產」嘅關係咁。大家都係文化遺產,邊個係「萬般」,又邊個係「業」呢?根據維基百科,「物質文化遺產」包括歷史文物,建築群,文化遺址呢啲有件嘢摸得到嘅嘢,摸得到呢咪就係「物質」囉。再睇下「物質文化遺產」嘅英文係Material Cultural Heritage。Material 呢個字嘅英文字面解釋係材料,物質甚至係資料。但係佢同時有一個好重要嘅meaning,就係「實質」。所以「物質文化遺產」係實實在在有件嘢摸得到又睇得到嘅,同呢件文化遺產有關嘅人,當佢瓜咗,離開呢個世界嘅時候,想搬埋佢跟佢走,佢係點拎點搬,搬十次,搬一百次,搬一萬次都無可能將呢件嘢搬埋佢跟佢走㗎嘞。既然件嘢搬成萬次都拎唔走,咁咪係「萬般」都帶不走囉。

咁係咪所有摸得到睇得到嘅就係「物質文化遺產」呢?咁又未必係喎。睇下維基又點講。維基認為文化智慧財產好似習俗、文化、信仰、傳統、知識同語言等各種非物質形式智慧財產嘅實踐、表演、表現形式、知識同技能包括其使用嘅工具、實物、工藝品同埋文化場所都可以定為係「非物質文化遺產」。嗱,有無發覺到呀,工具、實物、工藝品和文化場所呢啲都係摸得到睇得到,但係就被定性為「非物質文化遺產」。雖然呢啲都係實物,但佢哋其實全部都係道具,配角,甚至係茄喱啡,真正嘅主角係展現文化智慧財產嘅精神面貌,呢個精神面貌先至係成件事嘅靈魂所在。由於呢個精神面貌並非實質物體,佢係透過唔同型式將佢體現出嚟,好似拜神儀式呀,表演呀,制造過程呀等等,亦即係話,要有人「肯做」先可以體現到呢啲文化遺產,而呢種體現嘅型式係要透過一代人交俾下一代人咁一直一代一代傳承落去,呢啲咪就係所謂人雖然唔喺度,但精神係長存嘅囉。嗱,呢度有提到一個「非物質文化遺產」好重要嘅特質,就係承傳; 即係後繼有人,亦即係一路有人肯做落去。咁乜野嘢啲人先至肯一代一代咁做落去呢?睇睇香港嘅「非物質文化遺產」清單,差不多五百個items入面,著咗可能有1/3同手藝有關。好似紙紥工藝,雕制麻雀呀咁。呢啲全部都係快將失傳嘅工藝,今日你哋叫呢啲嘢係工藝,但係其實喺以前,呢啲係叫做工作,係用嚟揾食謀生嘅技能,亦即係以前啲人成人講嘅學番門手藝,咁將來咪揾到食囉。所以以前學師係不單只無人工,甚至要有人担保,啲師傅先會放心收你做學師,因為嗰個時代有一門手藝就成世都可以靠佢揾食,教識多一個人就多個人同你爭飯食,所以啲師傅最怕就係「教識徒弟無師傅」,咁你可想而知,一門手藝幾重要,佢係一個人嘅手藝,一個人嘅揾食工具,一個人嘅工作,如果佢做好啲,呢門手藝會可以喺佢一生人嘅事業,如果佢再將呢個事業再做好啲,做到一代傳一代又傳一代,代代相傳成為傳奇……咁就算佢自己唔喺度,就算過咗好多世,好多代,呢個事業仍然可以因為仲有人肯做而體現返佢做過嘅一切。呢個就係所謂「業」隨身,而呢個身亦已經唔係Day 1 創「業」嗰個身嘞,而係一代傳一代,有親密關係連成嘅下一代「身」。你可以簡稱佢為「下身」。而原文嗰個「身」,喺關係上俾呢個「下身」可以講更直接亦更remote。又嚟嘞,乜嘢叫做更直接亦更remote?原文呢個身,會將做過嘅「業」一直跟身,係自己帶住,就算過咗身,都係由前世身帶到今世身,再由今世身帶到來世身,無論過咗幾多世,呢個「業」都會一直跟身唔走,咁夠直接未。所唔同嘅係,呢個「身」同Day1創「業」嗰個「身」除咗帶住同一個業源之外,係可以完全無任何關係,甚至可以係唔同性別,再盡啲可以係唔同物種都仲得,豬狗牛馬十二生肖數晒都未夠,咁你話係咪好remote,根本就remote到你無法想像,無得估。

呢個好似非物質文化遺產跟住你世世代代嘅「業」,會一直世世代代咁傳落去,好嘅「業」會一直將好嘅影響帶落去。相反,壞嘅「業」,亦會一直將壞嘅影響帶落去。好嘅就無乜所謂啦,但係壞嘅呢,可以係仇恨,可以係怨氣,可以係冤冤相報,沒完没了……而呢個繼承咗前世「業」嘅下一世嘅「身」,你可以叫佢做「下世身」,呢個「下世身」會帶住上世嘅「業」嚟生存,亦會受呢個前世身做過嘅「業」影響,至於有幾大影響,就要睇個「業」嘅嚴重性,例如殺人放火梗係嚴重過欺騙感情啦; 同埋覆蓋範圍,即係牽涉到幾多人。呢個影響力可以叫「業力」,「業力」越大,「下世身」被「業力」支配越大,可以改變嘅嘢越少。咁係咪無得救又改唔到吖?咁又未必喎。


個大隻佬仲有一句好正嘅說話,「一念天堂,一念地獄」。呢句說話嘅力量足以改寫未來。唔只係今世身嘅未來,直程改寫埋下世身,下下世身,再下下下下下世身嘅未來。原來就算當你俾業力支配緊,你其實仲有得揀,而且只係用好簡單嘅方式,就係念,即係諗。你唔好睇小呢個諗,你雖然改變唔到以前做過嘅業,但透過點諗,就可以做就一個新嘅業,將原有嘅軌跡改變。有時候,呢一念之差,就可以有天堂同地獄嘅分别。所以啲人成日話,你係咪諗多咗呀?咁即係話你點諗㗎,離晒譜,離譜到好似天堂同地獄咁大嘅差距。呢一諗亦可以講係一瞬間,好短嘅剎那,好即時嘅諗法,亦可以用當下嚟形容。就喺當下嘅一個諗法,就可以扭轉將來下下下下下世身嘅業,你話幾化算呢。雖然咁做可以幫到下下下下下世身,但幫到幾多,你根本就計唔到,亦都管唔到。與其下世乜都唔知,點解今世唔化解咗佢呢?可能有好多人都係咁諗。

成世人流流長總或多或少有做過一啲對人唔住,又或者虧欠過人嘅嘢……一個無履行到嘅承諾; 一次嘅背叛; 一趟不辭而別; 一次又一次嘅人間蒸發; 一次又一次嘅傷害……呢啲嘢係就係過咗去,亦可能好多時都唔多記得,甚至有時直程係完全無意識,好似根本就無發生過咁。但呢啲嘢從來無離開過你,你唔知幾時,佢就會閃出嚟同你say個hi又fit一聲唔見咗; 又或者佢會慢慢……慢慢咁粒聲唔出咁跟住你,你點唔理佢,點趕佢,佢都係粒聲唔出咁係要跟住你; 無論點都好,就係業隨身……你唔理佢,佢唔單只跟你一世,佢會跟埋你下世再下世再下下世再下下下世……直到好多個下世; 怨,就係咁積番嚟㗎喇。

唔想咁樣可以點樣?與其留俾下世身,不如當下自己搞番。其實好多人都有諗過……不過往往諗嘅多,做嘅少……怕面對……如果俾你返到原點,去返你對唔住人嗰一刻,你又會點樣贖罪呢?又係咪可以將積怨化解,唔使留返俾下世呢?與其諗埋啲返唔到轉頭嘅嘢,不如簡單啲直接啲即刻去盡力做啲嘢,衷心表達你嘅歉意,將呢份心意,好真誠咁傳遞俾嗰啲你曾經對唔住嘅人,希望佢哋亦都能夠感受到你呢份誠意而原諒你。咁話唔定就可以化解到一段了無休止嘅仇恨。咁唔係幾好咩?

留言


請按此登錄後留言。未成為會員? 立即註冊
  • 紫蜜語 於 25/07/2020 評論 NO. 1

    幅圖裏面果位男士就係王虛中@@?(錯重點xdxdxdxdxd)

  • PMYIFP 於 26/07/2020 評論 NO. 2

    可能係劉華

  • 紫蜜語 於 26/07/2020 評論 NO. 3

    @口@......(驚訝)

快捷鍵:←
快捷鍵:→