閲讀理解 · 理解閲讀 (一)

有乜講乜 於 10/03/2019 發表 收藏文章
好多同學見到中文閲讀理解就無晒mood,心悸,手震,冒汗、耳鳴、眼花、腦袋一片空白、甚至休克瞓低。喺可能係中醫嘅角度嚟睇,呢啲徵狀叫做 - 「虛」!用通俗文學闡述就係兩個字 - 「淆底」!即係驚。

定啲嚟,重新再組織過。平時大家咪最驚背嘢,最鍾意考天聰嘅咩?咁閲讀理解就幫到你嘞。俾編文章你,問你幾條問題,仲要啲答案放响度俾埋你,咁就十幾廿分。喂!仲想點?唔使背又唔使記,即食無手尾,下次又唔會翻炒。好過成叠料擺係你面前,讀又有排讀,背又背唔晒,又唔知佢點出,估估下又提心吊膽,今次唔掂又怕佢覆啅,係咪?

對付敵人,要盡快了解你的敵人。有啲人睇編文一開始太認真,隻隻字都想唔明睇到明,睇完都廿九幾分鐘,得返三、五、七分鐘作答,再諗多兩諗,都交卷啦!你仲諗緊:「吓?乜諗嘢原來係咁晒時間㗎?」又中招「認真便輸了」。

紥好個馬步,要出招了!第一回合:先睇問題問乜,等佢自暴其短。再出閃電探手,快打全文揾佢弱點揾答案;攞咗啲易攞嘅點數先。第二回合:重温問題,緊記弱㸃,用埋身短打搜佢全身,睇佢全相重點出撃回答大題攞擊倒分。第三回合:睇通佢招式虛實,理解其招式套路、文章手法,你就可以攻守早著先機;睇通睇透就出昇龍終極一擊攞埋Bonus Marks,食住過勢,將佢KO。

10分嘅文章,第一、第二回合是純揾分,可能都唔完全明編文講乜;不過都攞咗6,7分啦。第三回合對編文起晒底,唔係人人都有咁高道行,仲要睇埋天資同後天努力嘞。不過,6,7分已經夠點數贏比賽。唔係下下要KO或者打死人先係贏嘅,係咪?與其浪費時間諗㸃KO人,不如快啲打下一場啦。等平時練功夫先慢慢諗啦,諗唔掂又可以問師父吖嘛!

呢嗰game plan無要求你完全明白編文章,但又可以攞夠㸃數,係咪好amazing呢?

有人講過:「要擁抱你的恐懼,就可以繼續前進。」咁你理唔理解自己驚乜吖?驚閲讀?驚理解?驚表達想法?其實你最驚係低分!如果完全無低分壓力,你會驚咩?平時你哋上上埋埋咁多網,睇咁多嘢,又視頻,又文章咁;你會怕閲讀?No Way! 平時上網出腐皮,出post字字鏗鏘,硬到噴汁,又唔見得你哋會手軟怕表達感想囉。所以關鍵係可以攞足點數,就可以「無壓閱讀」!

既然閲讀無壓力,就有興趣慢慢理解啦。唔信?咪試下啦,頂多咪晒你十零廿分鐘。攞唔到6,7分,咁咪試多幾次囉。我以前好快就可以攞足點數,KO就無十足把握嘞。有人講過:「功夫 - 兩個字,一橫一直。錯嘅,咪瞓係度囉;企返係度就講乜都啱。」閲讀理解,使乜驚呀!

如果喜歡我們的文章,請即分享到︰

標籤:   認真便輸了  淆底  DSE中文  無壓閲讀  

留言

會員
我要評論
請按此登錄後留言。未成為會員? 立即註冊
  • PMYIFP
    PMYIFP 於 10/03/2019 評論 NO. 1

    人氣11是代表甚麼?

  • PMYIFP
    PMYIFP 於 14/03/2019 評論 NO. 2

    怎樣才可成為精選?

快捷鍵:←
快捷鍵:→