上班達人 - 大開眼界

有乜講乜 於 12/03/2019 發表 收藏文章
上班達人 - 根據維基百科嘅說法,呢兩個字本身原意係「善於判斷,通達明理」之人。現在普遍應用嚟形容做某啲嘢好叻嘅人、高手咁啦。即係嗰啲人對某啲嘢挑通晒眼眉而又能夠俾到又或者係做到判斷。

上班 - 即係返工。呢個議題大到影響成個香港,呀!唔係,係成個世界唧GDP! 所以一講到返工呢家嘢,涉獵範圍同內容真係風冚咁湧埋嚟,無得停。我試圖整理歸納一套未經科學嚴緊驗證的系統以案例為基礎作為討論的起點,希望後學者能定出一套完整的規範。
案例一:返工的意義:小不忍則亂大牛
朋友公司請咗個新人,佢個probation evaluation report 如下:
a) 工作能力:講呢啲
b) 工作態度:唉
c) 考勤:見到就見啦!
d) 工作展望:無諗過
e) 工作熱誠:攝氏-273.15 (絕對零度)
連佢自己都唔想返工。咁就問下佢:「份工人工又唔係高($7k咁上下啦)㸃解會返呢份工呢?」佢話:「其實我做乜都無所謂,最緊要有份工返.......我唔返工,我屋企就唔會俾萬五蚊我嫁嘞⋯⋯」
呢種個案喺現今社會好普遍。

案例二:打工嘅其實係好被動㗎:可憐天下父母心

朋友請咗個女仔同事,都幾勤快。公司係要輪班嘅,一輪到夜更就成個禮拜收夜晚11點幾,雖然有夜更交通津貼,不過就唔算好多。新人更加走唔甩啦,返咗無幾耐就編佢返夜更啦。返咗第一晚,佢都好正常。不過,等二日,佢屋企人走上嚟公司。喂!你做乜要我個女咁夜返屋企呀,好危險㗎嘛!
吓?屋企人出頭?咁公司規矩係咁㗎喇。咁你想點吖?
佢擺㡳張支票幫個女辭咗職。打工嘅真係好被動。

案例三:好員工可激活生意:We are Family

又係嗰個朋友嗰份工,又係請咗個女仔新人,咁自然又係要返夜更啦。不過,佢就好腳頭嘞,一返夜班就多咗枱梗客。原來嗰枱客係佢屋企人嚟嘅,專程來等佢夜收,接佢返屋企。你點睇?
I love u. U love me. We are happy family.

案例四:對工作既堅持,對生活同樣執著

朋友間餐廳返工要著制服嘅,私人嘢就擺晒喺locker。你知啦,公司啲locker有幾安心㗎啦。有個靚妹新同事初嚟報到,點都習慣唔到,又全身名牌,正所謂:隨手伸一伸;貴過你全身。吖!你又唔好理,佢又堅持返工喎。但佢始終都唔肯對公司嗰個似有若無嘅locker妥協。嗱!又幫到公司生意嘞,從此間餐廳多咗長客;就係個靚妹屋企人揾咗工人幫佢拎著啲私人嘢,仲等佢收工tim。服未?無幾耐,個靚妹梗係受唔住其他同事嘅羨慕眼光,光榮引退啦。曾經有人講過:走係好容易,留喺度先係最難。個靚妹有潛質做特首,因為佢無戇居到「捨易取難」。

上班達人指嘅其實係嗰啲通達明理,挑通眼眉化晒嘅老seafood。有乜上班嘅奇人佢未見過吖,大郷理!



留言


請按此登錄後留言。未成為會員? 立即註冊
  • PMYIFP 於 14/03/2019 評論 NO. 1

    人氣24是怎樣計算出來

快捷鍵:←
快捷鍵:→